തിരുവനന്തപുരം
തദ്ദേശ സ്വയംഭരണ സ്ഥാപനങ്ങളുടെ സേവനങ്ങൾ ഓൺലൈനിൽ ലഭ്യമാക്കുന്ന സിറ്റിസൺ പോർട്ടലിലെ അപേക്ഷകൾ 10 ലക്ഷം കടന്നു. വെള്ളി വൈകിട്ടുവരെ 10,05,557 അപേക്ഷയാണ് സമർപ്പിച്ചത്. ഇതിൽ 7,33,807 ഫയലും (74 ശതമാനം) തീർപ്പാക്കി. പഞ്ചായത്തുകളിലെ ഫയലുകളിൽ 74 ശതമാനവും (8,66,047ൽ 6,37,628), കോർപറേഷനിൽ 80ഉം (36,954ൽ 29,425), മുനിസിപ്പാലിറ്റികളിൽ 70ഉം (1,07,058ൽ 74,556) ഫയലാണ് ഓൺലൈനായി സ്വീകരിച്ച് തീർപ്പാക്കിയത്. https://citizen.lsgkerala.gov.in വെബ്സൈറ്റു വഴിയാണ് അപേക്ഷിക്കേണ്ടത്. പോർട്ടൽവഴി 264 സേവനം ലഭിക്കും.
മലപ്പുറം, പാലക്കാട്, തൃശൂർ ജില്ലകളിലാണ് ഏറ്റവുമധികം അപേക്ഷകൾ ഓൺലൈനിൽ ലഭിച്ചത്. ഫയലുകൾ തീർപ്പാക്കിയതിൽ വയനാട് ജില്ലയാണ് ഒന്നാംസ്ഥാനത്ത് -(84 ശതമാനം). ഇ–- ഗവേണൻസ് രംഗത്തെ കേരളത്തിന്റെ മികച്ച നേട്ടമാണിതെന്ന് തദ്ദേശമന്ത്രി എം ബി രാജേഷ് പറഞ്ഞു.
നഗരസഭകളുടെ എല്ലാ സേവനങ്ങളും ഓൺലൈനായി ലഭ്യമാക്കുന്ന സംവിധാനം രണ്ടു മാസത്തിനുള്ളിൽ പ്രവർത്തനസജ്ജമാകും. ഫയലുകൾ ഏത് ഓഫീസറുടെ മുന്നിലാണെന്നും എന്ത് നടപടി സ്വീകരിച്ചെന്നും അപേക്ഷകനും ജനപ്രതിനിധികൾക്കും ഉന്നത ഉദ്യോഗസ്ഥർക്കും നിരീക്ഷിക്കാം.
അഴിമതിരഹിതവും സമയബന്ധിതവുമായി സേവനങ്ങളുറപ്പിക്കാൻ ഇതിലൂടെ കഴിയും. പഞ്ചായത്തുകളിൽ ഐഎൽജിഎംഎസ് വഴിയും ഏഴുമാസംകൊണ്ട് ഫ്രണ്ട് ഓഫീസ് വഴിയും ഓൺലൈനായി ലഭിച്ചതും ഉൾപ്പെടെ 65,82,075 ഫയലാണ് കൈകാര്യം ചെയ്തത്. ഇതിൽ 52,08,731 ഫയലും (79.14 ശതമാനം) തീർപ്പാക്കി.
