പാലക്കാട്> കാറിൽ ലഹരിമരുന്ന് കടത്തുന്നതിനിടെ വ്ലോഗറും സുഹൃത്തും പിടിയിൽ. വിക്കി തഗ് യുട്യൂബ് ചാനൽ വ്ലോഗർ ആലപ്പുഴ മാവേലിക്കര ചുനക്കര മംഗലത്ത് വിഘനേഷ് വേണുവും കായംകുളം ഓച്ചിറ കൃഷ്ണപുരം കൊച്ചുമുറി എസ് വിനീതുമാണ് പിടിയിലായത്. ലഹരിമരുന്ന് പരിശോധനക്കിടെ എക്സെെസ് സംഘം പിന്തുടർന്ന് പിടികൂടുകയായിരുന്നു.
വാളയാറിൽ വാഹന പരിശോധനയ്ക്കിടെ നിർത്താതെ പോയ കാർ പാലക്കാട് ചന്ദ്രനഗറിൽ നിന്നാണ് എക്സൈസ് സംഘം പിന്തുടർന്ന് പിടികൂടിയത്. വാളയാർ ടോൾ പ്ലാസയിലെ ഡിവൈഡറിൽ ഇടിച്ച കാർ അതിവേഗത്തിൽ ഓടിച്ച് പോകുകയായിരുന്നു.
പ്രതികൾ സഞ്ചരിച്ച കാറിൽ നിന്നും 40 ഗ്രാം മെത്താം ഫെറ്റിൻ, തോക്ക്, വെട്ടുകത്തികൾ എന്നിവ എക്സൈസ് കണ്ടെത്തി. തോക്കിന് ലൈസൻസ് ഇല്ലെന്നാണ് റിപ്പോർട്ട്. അറസ്റ്റിലാകുമ്പോൾ വിഘ്നേഷും വിനീതും ഉയർന്ന തോതിൽ ലഹരി ഉപയോഗിച്ചിരുന്നതായി അധികൃതർ വ്യക്തമാക്കി.
