ലണ്ടൻ > കേരളത്തിലെ വിനോദസഞ്ചാര കേന്ദ്രങ്ങളുടെ പരിപാലനം ലക്ഷ്യംവെച്ചുകൊണ്ട് രൂപീകരിച്ച ടൂറിസം ക്ലബ്ബ് അന്താരാഷ്ട്ര തലത്തിലേക്കും വ്യാപിക്കുന്നു. ലണ്ടൻ ട്രിനിറ്റി സെന്ററിൽ വെച്ചാണ് ടൂറിസം ക്ലബ്ബിന്റെ രൂപീകരണയോഗം നടന്നത്. ലണ്ടനിലെ മലയാളി യുവത്വം ഏറെ ആവേശത്തോടെയാണ് ടൂറിസം ക്ലബ്ബിന്റെ ഭാഗമായത്. ലോകത്ത് തന്നെ കേരളാ ടൂറിസത്തിന്റെ യുവ അംബാസഡർമാരായി മാറുകയാണ് ടൂറിസം ക്ലബ് അംഗങ്ങൾ.
കേരളത്തിന്റെ ടൂറിസം പ്രചാരകരായി ലോകമെമ്പാടുമുള്ള മലയാളി യുവത്വത്തെ ഉപയോഗപ്പെടുത്തുകയാണ് അന്താരാഷ്ട്ര ടൂറിസം ക്ലബ്ബിലൂടെ ലക്ഷ്യംവെക്കുന്നതെന്ന് മന്ത്രി മുഹമ്മദ് റിയാസ് പറഞ്ഞു. അതോടൊപ്പം അവരുടെ നൂതന ആശയങ്ങളും കേരളാടൂറിസത്തിന്റെ വികസനത്തില് ഉപയോഗപ്പെടുത്താനാകും. അന്താരാഷ്ട്ര ടൂറിസം ക്ലബ്ബിന് തുടക്കം കുറിച്ചത് ലണ്ടനിൽ വെച്ചാണ്. മറ്റു പ്രധാനപ്പെട്ട വിദേശരാജ്യങ്ങളിലും ടൂറിസം ക്ലബ്ബുകൾആരംഭിക്കുന്നതിനുള്ള ചർച്ചകൾനടന്നുവരികയാണെന്നും മന്ത്രി പറഞ്ഞു.
