തിരുവനന്തപുരം > കേരള പബ്ലിക് സർവ്വീസ് കമ്മീഷൻ പുതിയ ചെയർമാനായി ഡോ. എം ആർ ബൈജുവിനെ ശിപാർശ ചെയ്യാൻ മന്ത്രിസഭ തീരുമാനിച്ചു. നിലവിലെ ചെയർമാൻ അഡ്വ. എം കെ സക്കീർ ഒക്ടോബർ 30 ന് വിരമിക്കുന്ന ഒഴിവിലാണ് പുതിയ നിയമനം.
ഡോ. എം ആർ ബൈജു നിലവിൽ പിഎസ്സി അംഗമാണ്. 2017 ജനുവരി 9നാണ് പിഎസ്സി അംഗമായി ചുമതയേറ്റത്. തിരുവനന്തപുരം അമ്പലമുക്ക് സ്വദേശിയാണ്. എം.ടെക്ക് പൂർത്തിയാക്കി എൻജിനീയറിയങ്ങിൽ ഡോക്ടറേറ്റ് നേടിയിട്ടുണ്ട്. തിരുവനന്തപുരം ഗവ. എൻജിനീയറിങ്ങ് കോളജിൽ ഇലക്ട്രോണിക്സ് ആൻഡ് കമ്മ്യൂണിക്കേഷനിൽ പ്രൊഫസറായിരിക്കെയാണ് പിഎസ്സി അംഗമായി നിയമിതനായത്. ഭാര്യ: മഞ്ജു എസ്ദേവ്. സാഗര, ആരതി കൃഷ്ണ എന്നിവർ മക്കളാണ്.
