അങ്കമാലി > അങ്കമാലിയിൽ കെഎസ്ആർടിസി ബസ്സും ടൂറിസ്റ്റ് ബസ്സും കൂട്ടിയിടിച്ച് യുവതി മരിച്ചു. മലപ്പുറം സ്വദേശി സെലീന (38) ആണ് മരിച്ചത്. ഞായർ പുലർച്ചേ 5.30 ഓടെ അങ്കമാലി കെഎസ്ആർടിസി ബസ് സ്റ്റാൻഡിന് മുമ്പിലായിരുന്നു അപകടം. വിദേശത്ത് നിന്നെത്തി നെടുമ്പാശ്ശേരി എയർപോർട്ടിൽനിന്ന് നാട്ടിലേക്ക് മടങ്ങുമ്പോഴായിരുന്നു അപകടം.
എറണാകുളം ഭാഗത്ത് നിന്ന് വന്ന കെഎസ്ആർടിസി ബസ് അങ്കമാലി സ്റ്റാന്റിനകത്തേക്ക് കയറാനായി തിരിച്ചപ്പോൾ ബസ്സിന്റെ പിറകിൽ തൃശ്ശൂർ ഭാഗത്തുനിന്ന് വന്ന ടൂറിസ്റ്റ് ബസ് ഇടിക്കുകയായിരുന്നു. ഇടിയുടെ ആഘാതത്തിൽ ബസിന്റെ പുറകിൽ ഇരിക്കുകയായിരുന്ന സെലീന ബസിൽ നിന്നും പുറത്തേക്ക് തെറിച്ച് വീണു.
ഉടനെ അങ്കമാലിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം അങ്കമാലി താലൂക്ക് ആശുപത്രിയിൽ സൂക്ഷിച്ചിട്ടുണ്ട്. അങ്കമാലി പൊലീസും ഫയർഫോഴ്സും ചേർന്ന് രക്ഷാപ്രവർത്തനങ്ങൾക്ക് നേതൃത്വം നൽകി.
