കൊല്ലം > ആർഎസ്പി സംസ്ഥാന സമ്മേളനത്തിൽ സംസ്ഥാന കമ്മിറ്റി അംഗങ്ങളുടെ എണ്ണം കുറയ്ക്കാനുള്ള തീരുമാനം ഷിബു ബേബിജോൺ പക്ഷത്തെ വെട്ടിനിരത്താനുള്ള അവസരമാക്കാൻ എ എ അസീസ്–-എൻ കെ പ്രേമചന്ദ്രൻ കൂട്ടുകെട്ടിന്റെ നീക്കം. നിലവിൽ 81 അംഗ കമ്മിറ്റിയിൽ പ്രതിനിധികളുടെ എണ്ണം 51 ആയി ചുരുക്കാനാണ് തീരുമാനം. ഷിബു ബേബിജോണിനൊപ്പം നിൽക്കുന്നവരെ ഒഴിവാക്കുകയാണ് ലക്ഷ്യം. സെക്രട്ടറി സ്ഥാനം നിലനിർത്താൻ എ എ അസീസ്, പ്രേമചന്ദ്രനൊപ്പം ചേർന്ന് നടത്തുന്ന നീക്കങ്ങളെ ശക്തമായി നേരിടാനാണ് ഷിബു ബേബിജോൺ പക്ഷത്തിന്റെ തീരുമാനം.
പുനരേകീകരണ സമ്മേളനം നടത്തി ആർഎസ്പിയും ഷിബു ബേബിജോൺ സെക്രട്ടറിയായിരുന്ന ആർഎസ്പി ബിയും ലയിച്ചതോടെയാണ് വിവിധ കമ്മിറ്റികളിൽ അംഗസംഖ്യ കൂട്ടിയത്. എന്നാലത് പാർടി ഭരണഘടനയ്ക്ക് എതിരാണെന്നും അംഗസംഖ്യ കുറയ്ക്കണമെന്നുമാണ് സംസ്ഥാന സെക്രട്ടറിയുടെ നിർദേശം. കൊല്ലം ജില്ലയിൽ മണ്ഡലം സെക്രട്ടറിമാരിൽ ഏറെയും പ്രേമചന്ദ്രൻ പക്ഷക്കാരാണ്. ചവറ, ശൂരനാട് മണ്ഡലം സെക്രട്ടറിമാരാണ് ഷിബുവിനൊപ്പമുള്ളത്.
