കുഞ്ഞില മാസിലാമണി സംവിധാനം ചെയ്ത ‘അസംഘടിതർ’ എന്ന ചിത്രത്തിലെ കടയുടമയായ പ്രസാദിന്റെ വേഷമാണ് സുനിൽ കുമാർ എന്ന കുമാറിനെ പെട്ടെന്ന് സംവിധായകരുടെ അടക്കം ശ്രദ്ധയിലെത്തിച്ചത്. സംവിധായകൻ ജിയോ ബേബിയുടെ ഏറ്റവും പുതിയ ചിത്രമായ ശ്രീധന്യ കാറ്ററിംഗ് സെർവിസിലെ തനി കോഴിക്കോട്ടുകാരൻ അളിയൻ എന്ന കഥാപാത്രത്തിലൂടെ സിനിമയിൽചുവടുറപ്പിക്കുകയാണ് മലപ്പുറം ജില്ലയിലെ വള്ളിക്കുന്നുകാരൻ.
ഒടിയൻ, കുഞ്ഞാലി മരയ്ക്കാർ പോലുള്ള ചിത്രങ്ങളിൽ ചെറിയ വേഷങ്ങൾ ചെയ്തിരുന്നു. അതിനിടയിൽ അസംഘടിതർ എന്ന ചിത്രത്തിലെ കടയുടമയായ പ്രസാദ് എന്ന കഥാപാത്രം ഏറെ ചർച്ച ചെയ്യപ്പെട്ടു. ഒടിടിയിൽ സിനിമ കണ്ട മലയാള സിനിമയിലെ പല സംവിധായകരും വിളിച്ച് അഭിനന്ദിച്ചതായി കുമാർ പറഞ്ഞു. ഇതിനു ശേഷമാണു ശ്രീധന്യ കാറ്ററിംഗ് സർവീസ് എന്ന സിനിമയിലേക്ക് ജിയോ ബേബിയുടെ ക്ഷണം കിട്ടുന്നത്.
അസംഘടിതരി’ൽ കുമാർ
നാടകനടനായി ഏറെ അംഗീകാരങ്ങൾ നേടിയശേഷമാണ് കുമാർ സിനിമയിലെത്തുന്നത്. സ്കൂൾ സമയത്താണ് നാടകാഭിനയം തുടങ്ങുന്നത്. കോളേജിൽ പഠിക്കുന്ന കാലത്ത് അമച്വർ നാടകങ്ങളിലേക്ക് തിരിഞ്ഞു. കുമാർ തന്നെ കഥയെഴുതി സുരേഷ് ബാബു സംവിധാനം ചെയ്ത ‘പാവം പാവം അവിവാഹിതർ’ എന്നനാടകം സൂര്യ ഫെസ്റ്റിവലിൽ വളരെയധികം ശ്രദ്ധയാകർഷിക്കുകയുണ്ടായി. കേരള സംഗീതനാടകഅക്കാദമി മത്സരത്തിനു വേണ്ടി എമിൽമാധവി സംവിധാനം ചെയ്ത മൂന്ന് നാടകത്തിലും പ്രധാനവേഷം കൈകാര്യം ചെയ്തു. ഒരു തവണ മികച്ച നടനുള്ള പുരസ്കാരം ലഭിച്ചു
ജയപ്രകാശ് കുളൂർ സംവിധാനം ചെയ്ത വെളിച്ചെണ്ണ എന്ന നാടകവുമായി കാസർഗോഡ് നിന്ന് തിരുവനന്തപുരം വരെ വീടു വീടാന്തരം കയറി നടത്തിയ ഒരു നാടകയാത്രയുടെ ചരിത്രവുമുണ്ട്. ബിരുദം പുർത്തിയാക്കിയ ശേഷമായിരുന്നു അത്. ഓരോ വീട്ടുമുറ്റവും ചിരിയും ചിന്തയും കൊടുത്ത് കൊണ്ട് അധികം ആരും അറിയപ്പെടാത്ത ഒരു നാടകക്കാരനായി കുമാറിന്റെ യാത്രകൾ കേരളത്തിലുടനീളം നടന്നു നീങ്ങി. തിരുവനന്തപുരം എത്തുമ്പോഴേക്കും ആയിരത്തിലധികം വീട്ടുമുറ്റങ്ങൾ പിന്നിട്ടിരുന്നു. കൃഷ്ണ മൂർത്തിയുടെ സൂര്യ ഫെസ്റ്റിവലിൽ തുടർച്ചയായി 10 നാടകങ്ങൾ അവതരിപ്പിച്ചു.
സിനിമയിൽ തിരക്കായി വരുമ്പോഴും നാടകം വിടാൻ കുമാർ തയ്യാറല്ല. ഏറ്റവും അടുത്ത സുഹൃത്തും കേരള സാഹിത്യഅക്കാഡമി അവാർഡ് ജേതാവുമായ റഫീഖ് മംഗലശേരി സംവിധാനം ചെയ്യുന്ന പുതിയ നാടകത്തിലാണ് ഇപ്പോൾ അഭിനയിക്കുന്നത്. എമിൽ മാധവിയുടെ നാടകത്തിലും അഭിനയിക്കുന്നുണ്ട്. മഞ്ജു വാര്യർ പ്രധാന വേഷം ചെയ്യുന്ന വെള്ളരി പട്ടണം എന്ന സിനിമയിൽ വില്ലൻ സ്വഭാവം ഉള്ള വേഷമാണ് ചെയ്യുന്നത്. ശ്രീധന്യ യിലെ കുമാറിൻറെ രസികൻ കഥാപാത്രമായ അളിയനെ കാണാൻ തൊട്ടടുത്ത തിയേറ്റർ ആയ കോഴിക്കോട് ക്രൗണിൽ നാട്ടുകാരുടെ തിരക്കാണ്. നാട്ടിൽ ഏറെ സൗഹൃദങ്ങൾ ഉള്ള കുമാറിൻറെ വള്ളിക്കുന്ന് ഒരു നടനെ കിട്ടിയ ആഹ്ലാദത്തിലാണ്.
ശ്രീധന്യ കാറ്ററിംഗിൽ കുമാർ
