തിരുവനന്തപുരം> കേരളസമൂഹത്തില് സ്ത്രീകള്ക്ക് തുല്യ ഇടത്തിനായി ജീവിച്ച പോരാളിയായിരുന്നു മേരി റോയ് എന്ന് സിപിഐ എം പോളിറ്റ് ബ്യൂറോ അംഗം എം എ ബേബി. തിരുവിതാംകൂര് ക്രിസ്ത്യന് പിന്തുടര്ച്ചാവകാശനിയമം പിന്തുടര്ന്നു വന്നിരുന്ന സുറിയാനി ക്രിസ്ത്യാനി സ്ത്രീകള്ക്ക് പിതാവിന്റെ സ്വത്തില് അവകാശം ഇല്ല എന്ന സമ്പ്രദായത്തെ ചോദ്യം ചെയ്യുക മൂലം കേരളത്തിലെ പുരുഷാധിപത്യത്തിന്റെ ഒരു നെടുംതൂണിനെയാണ് മേരി റോയ് വെല്ലുവിളിച്ചത്.
1952ലെ ഇന്ത്യാ ആക്ടില് ഈ തിരുവിതാംകൂര് പിന്തുടര്ച്ചാവകാശനിയമം ഉള്പ്പെടുത്തിയിട്ടില്ലാത്തതിനാല് ആണ്-പെണ് മക്കള്ക്ക് തുല്യ സ്വത്തവകാശം ചട്ടപ്പെടുത്തുന്ന ഇന്ത്യന് പിന്തുടര്ച്ചാവകാശ നിയമമാണ് തിരുവിതാംകൂറിലെ സുറിയാനി ക്രിസ്ത്യാനികള്ക്കും ബാധകം എന്നായിരുന്നു സുപ്രീം കോടതിയുടെ നിര്ണായകമായ വിധി. 1952ലെ ഇന്ത്യാ ആക്ടില് പട്ടികപ്പെടുത്തിയിട്ടില്ലാത്ത നാട്ടുരാജ്യനിയമങ്ങള് നിലനില്ക്കുന്നില്ല എന്ന സാങ്കേതികപ്രശ്നത്തില് ഊന്നിയായിരുന്നു ഈ വിധി.
കോട്ടയത്ത് മേരി റോയ് ആരംഭിച്ച കോര്പ്പസ് ക്രിസ്റ്റി എന്ന വിദ്യാലയം പിന്നീട് പള്ളിക്കൂടം എന്ന് പേരുമാറ്റി തുടര്ന്നു. കേരളത്തിലെ വിദ്യാഭ്യാസരംഗത്തെ സാഹസികമായ ഒരു പരീക്ഷണം ആയിരുന്നു ഇത്. ക്രിസ്തുവിന്റെ ആറാം തിരുമുറിവ് എന്ന പേരില് ഈ സ്കൂളിലെ കുട്ടികള് അവതരിപ്പിച്ച ഒരു നാടകത്തിന്റെ പേരില് അക്കാലത്ത് ക്രിസ്ത്യന് വര്ഗീയവാദികള് വലിയ കോലാഹലം ഉണ്ടാക്കി. അന്ന് കോട്ടയം കളക്ടര് ആയിരുന്ന അല്ഫോന്സ് കണ്ണന്താനം ഈ സ്കൂള് നാടകം നിരോധിച്ചു. വെല്ലുവിളികള് ഏറ്റെടുക്കുന്നതില് ഒരിക്കലും മടിയില്ലാത്ത മേരി റോയ് ഒരു കോടതി വിധിയുടെ അനുവാദത്തോടെ ആ നാടകം സ്കൂളില് നടത്തുക തന്നെ ചെയ്തു.
നമ്മുടെ ഇടയില് ജീവിച്ചിരുന്ന കാതലുള്ള ഒരു ധിക്കാരിയാണ് ഇന്ന് നമ്മെ വിട്ടു പിരിഞ്ഞത്. മേരി റോയിയുടെ നിര്യാണത്തില് മകള് അരുന്ധതി റോയ്ക്കും മറ്റ് കുടുംബാംഗങ്ങള്ക്കു അനുശോചനം അറിയിക്കുവെന്നും എം എ ബേബി പറഞ്ഞു
