‘അമ്മച്ചിയെ സന്തോഷത്തോടെ യാത്രയാക്കിയതാണ് അവിടെ കണ്ടത്’; എന്തിന് വിമര്‍ശനം: കുടുംബം ചോദിക്കുന്നു

മരണ വീട്ടില് മൃതദേഹത്തിന് ചുറ്റുമിരുന്ന് ചിരിച്ചുകൊണ്ട് ഫോട്ടോയ്ക്ക് പോസ് ചെയ്യുന്ന ക്രിസ്ത്യന് കുടുംബത്തെ കുറിച്ചാണിപ്പോള് സോഷ്യല് മീഡിയ ചര്ച്ച ചെയ്യുന്നത് . കോട്ടയം മല്ലപ്പള്ളി സ്വദേശി മറിയാമ്മയാണ് 95ാം വയസ്സില് നിര്യാതയായത്. അവരുടെ കുടുംബാംഗങ്ങളാണ് ഒരുമിച്ചിരുന്ന് ഫോട്ടോ എടുക്കുകയും പിന്നീടത് സോഷ്യല് മീഡിയയില് ചര്ച്ചയാകുകയും ചെയ്തത്

പരേതനായ വൈദികന് പി ഒ വര്ഗീസിന്റെ ഭാര്യയാണ് മറിയാമ്മ. കുടുംബത്തിലെ സ്വകാര്യ സംഭവം സോഷ്യല് മീഡിയ വഴി പ്രചരിക്കപ്പെട്ടപ്പോള് പല തരത്തിലുള്ള അഭിപ്രായമാണ് ഇതുമായി ബന്ധപ്പെട്ട് ഉയര്ന്നത്. മരണ സമയത്ത് സന്തോഷം പങ്കിടുന്ന തരത്തില് കുടുംബം പെരുമാറുന്നത് ശരിയല്ലെന്ന തരത്തിലും അഭിപ്രായങ്ങള് ഉയര്ന്നു. ഇതിനെല്ലാം വിശദീകരണം നല്കുകയാണ് മരണപ്പെട്ട ആളുടെ കുടുംബാംഗം.

മറിയാമ്മയുടെ കുടുംബാംഗവും ഡോക്ടറുമായ ഉമ്മന് പി നൈനാന്റെ വാക്കുകള് ഇങ്ങനെ.

‘എന്റെ അച്ഛന്റെ ചേട്ടന്റെ ഭാര്യയാണ് മരിച്ച മറിയാമ്മ. ക്രിസ്തീയ വിശ്വാസപ്രകാരം മരിച്ചാല് സ്വര്ഗത്തില് പോകുമെന്നാണ് വിശ്വാസം. മറിയാമ്മ എന്ന അമ്മച്ചി വളരെ നല്ല ജീവിതമാണ് നയിച്ചത്. അമ്മച്ചി സ്വര്ഗത്തില് പോകുന്ന സന്തോഷമാണ് അവിടെ പ്രകടമായത്. തലേദിവസം നാല് മണിക്കാണ് വീട്ടിലേക്ക് മൃതശരീരം കൊണ്ടുവന്നത്. ഈ ഫോട്ടോ എടുക്കുന്നത് അടുത്തദിവസം വെളുപ്പിന് മൂന്ന് മണിയോടെ. അതുവരെ അമ്മച്ചിക്കൊപ്പം കുടുംബാംഗങ്ങളെല്ലാം ഒത്തുകൂടി, പ്രാര്ഥിച്ചു. അമ്മച്ചി ജീവിച്ചിരുന്നപ്പോഴുള്ള അനുഭവങ്ങള് മക്കളും കൊച്ചുമക്കളും മറ്റ് കുടുംബാംഗങ്ങളും എല്ലാവരും ചേര്ന്ന് പങ്കുവച്ചു.

കുറച്ച് നേരം വിശ്രമിക്കാനായി എല്ലാവരും പിരിയാന് നേരത്താണ് ഈ ഫോട്ടോ എടുത്തത്. ഞങ്ങളുടെ കുടുംബത്തിന്റെ സ്വകാര്യതയില് മാത്രം ഒതുങ്ങേണ്ട ഈ ചിത്രം എങ്ങനെയോ പുറത്തെത്തി. അത് പിന്നെ വൈറലായി. അതിനെ മോശം രീതിയില് ചിലര് പ്രചരിപ്പിച്ചു. പ്രത്യാശയുള്ള ഒരു മരണാനന്തര ജീവിതം അമ്മച്ചിക്ക് ലഭിക്കുമെന്നാണ് ഞങ്ങളുടെ വിശ്വാസം. അതാണ് സന്തോഷത്തോടെ യാത്രയാക്കാന് കാരണം.

കഴിഞ്ഞ ഒരു വര്ഷമായി പൂര്ണമായി കിടപ്പിലായിരുന്നു. 9 മക്കളുണ്ട് അമ്മച്ചിക്ക്. അതിലൊരാള് മരിച്ചു. ബാക്കി എല്ലാവരും ചേര്ന്ന് നന്നായി നോക്കി. കൃത്യമായി ശുശ്രൂഷിച്ചു. ഇവിടെ പരിഹസിക്കാന് എന്തിരിക്കുന്നു?. മോശം പ്രചരണം നടത്തുന്നവരുടെ മാനസികാവസ്ഥയാണ് തുറന്നുകാട്ടപ്പെടുന്നത്. മരിച്ചാല് കരയുക മാത്രമേ ചെയ്യാവൂ എന്ന് പറയുന്നവരോട് എന്ത് പറയാനാണ്. കുടുംബാംഗം എന്ന നിലയില് ഒരു അപേക്ഷയുണ്ട്. ഈ ചിത്രം ഇത്തരത്തില് കൂടുതല് പ്രചരിപ്പിക്കരുത്. മറ്റുള്ളവരെ കളിയാക്കുന്നതില് നിന്ന് എന്ത് സന്തോഷമാണ് ഇവര്ക്ക് കിട്ടുന്നത്?. ഞങ്ങളെ പിന്തുണയ്ക്കുന്നവരും ഏറെ ഉണ്ടെന്ന് അറിയുന്നതില് സമാധാനം’.

ചിരിക്കാതെ ചിത്രമെടുക്കാമായിരുന്നുവെന്നും മോശം കമന്റുകള് അവജ്ഞയോടെ തള്ളണമെന്നും ഒരുകൂട്ടം അഭിപ്രായപ്പെട്ടപ്പോള്, തമിഴ്നാട്ടില് പാട്ടും കൊട്ടുമായി തുള്ളാറുണ്ടെന്നും അതൊക്കെ ഓരോരുത്തരുടെ വ്യക്തിപരമായ കാര്യമാണെന്നും നിരവധി കമന്റുകളുണ്ടായി. സംഭവത്തില് ഇപ്പോഴും ചര്ച്ചകള് തുടരുകയാണ്