കോട്ടയം> നവാഗതനായ സനൽ വി. ദേവൻ സംവിധാനം ചെയ്യുന്ന “കുഞ്ഞമ്മിണീസ്ഹോസ്പിറ്റൽ” എന്ന സിനിമയുടെ ചിത്രീകരണം ഇരിഞ്ഞാലക്കുടയിൽ സമാപിച്ചു. ഇന്ദ്രജിത് സുകുമാരൻ, നൈല ഉഷ, ബാബുരാജ്, സരയു മോഹൻ, പ്രകാശ് രാജ് എന്നിവരാണ് ചിത്രത്തിലെ പ്രധാന കഥാപാത്രങ്ങളായി എത്തുന്നത്. ഫാൻറസിയും ഹ്യൂമറും ചേർന്ന രസകരമായ ഒരു കഥയാണ് ഈ ചിത്രത്തിലൂടെ പ്രേക്ഷകരിലേക്ക് എത്തിക്കാൻ ശ്രമിക്കുന്നതെന്ന് സിനിമയുടെ അണിയറ പ്രവർത്തകർ വ്യക്തമാക്കി.
“പ്രിയൻ ഓട്ടത്തിലാണ്” എന്ന സൂപ്പർഹിറ്റ് ചിത്രത്തിനുശെഷം “വൌ സിനിമാസി”ൻറെ ബാനറിൽ സന്തോഷ് ത്രിവിക്രമൻ നിർമ്മിക്കുന്ന ഈ ചിത്രത്തിൻറെ ഛായാഗ്രഹണം നിർവ്വഹിക്കുന്നത് അജയ് ഡേവിഡ് കാച്ചാപ്പിള്ളിയാൺ. പ്രിയൻ ഓട്ടത്തിലാണ്, ചതുർമുഖം എന്നീ ചിത്രങ്ങളുടെ രചയിതാക്കളായ അഭയകുമാർ കെ, അനിൽ കുര്യൻ എന്നിവർ തന്നെയാണ് ഈ സിനിമയുടേയും കഥ, തിരക്കഥ, സംഭാഷണം നിർവ്വഹിച്ചിരിക്കുന്നത്. ഇവർ, പുണ്യാളൻ അഗർബത്തീസ്, സു സു സുധി വാത്മീകം എന്നീ സിനിമകളുടെ രചനയിലും ഇവർ ഭാഗമായിരുന്നു.
ഈ ചിത്രത്തിൽ വളരെ പ്രധാന്യമുള്ള ഒരു വേഷം അവതരിപ്പിച്ച പ്രകാശ് രാജ് രണ്ട് ഘട്ടങ്ങളിലായി തൻറെ ഷൂട്ടിങ്ങ് പൂർത്തിയാക്കിയിരുന്നു. ഹരിശ്രീ അശോകൻ, പ്രശാന്ത് അലക്സാണ്ടർ, ശാരി, ശരത് ദാസ്, ബിനുപപ്പു, മല്ലിക സുകുമാരൻ, ഗംഗാമീര, അൽത്താഫ് മനാഫ്, ജെയിംസ് ഏലിയാ, അഭിറാം, സുധീർ പറവൂർ, ഉണ്ണിരാജ, സ്ഫടികം ജോർജ്, ജിലു ജോസഫ്, സജീദ് പട്ടാളം, അനിൽ കുമാർ തുടങ്ങിയവരാണ് മറ്റ് അഭിനേതാക്കൾ. ഒരു പ്രധാന കഥാപാത്രമായി ആഷ് വി പ്രജിത് എന്ന ബാലതാരത്തെ ഈ സിനിമയിലൂടെ അവതരിപ്പിക്കുന്നു. ബി കെ ഹരിനാരായണൻ, വിനായക് ശശികുമാർ, സന്തോഷ് വർമ്മ എന്നിവർ എഴുതിയ വരികൾക്ക് രഞ്ജിൻ രാജ് സംഗീത സംവിധാനം നിർവ്വഹിക്കുന്നു.
ലൈൻ പ്രൊഡ്യൂസർ – ഷിബു ജോബ്, എസ്കിക്യൂട്ടീവ് പ്രൊഡ്യൂസർ – അനീഷ് സി സലിം, പ്രൊഡക്ഷൻ കണ്ട്രോളർ – ഷബീർ മലവട്ടത്ത് , എഡിറ്റർ – മൻസൂർ മുത്തൂട്ടി, മേക്കപ് – മനു മോഹൻ, കോസ്റ്റ്യൂം ഡിസൈനർ – നിസാർ റഹ്മത്ത്, ആർട്ട് – ജയൻ ക്രയോൺ, ചീഫ് അസോസിയേറ്റ് ഡയറക്ടർ – സ്യമന്തക് പ്രദീപ്, ഫിനാൻസ് കണ്ട്രോളർ – അഗ്നിവേശ്, വി എഫ് എക്സ് – പ്രോമിസ്, സ്റ്റിൽസ് –രാഹുൽഎം സത്യൻ, ഡിസൈനർ- ഏസ്തറ്റിക് കുഞ്ഞമ്മ.
