ഇസ്ലാമാബാദ്> ഭീകരസംഘടനയായ തെഹ്രിക് ഇ താലിബാൻ പാക്കിസ്ഥാന്റെ (ടിടിപി) നേതാവ് ഒമർ ഖാലിദ് ഖൊറസാനിയും 3 കൂട്ടാളികളും കൊല്ലപ്പെട്ടു. ഞായറാഴ്ച വൈകി അഫ്ഗാനിസ്ഥാനിലെ ബർമാൽ ജില്ലയ്ക്ക് സമീപമുള്ള കിഴക്കൻ പക്തിക പ്രവിശ്യയിലുണ്ടായ കുഴിബോംബ് സ്ഫോടനത്തിലാണ് ഇവർ സഞ്ചരിച്ച കാർ തകർന്നത്.
മുഫ്തി ഹസൻ, ഹാഫിസ് ദൗലത്ത് ഖാൻ എന്നിവരും ഇവരുടെ വാഹനത്തിന്റെ ഡ്രൈവറുമാണ് കൊല്ലപ്പെട്ട മറ്റ് മൂന്നുപേർ. സ്ഫോടനങ്ങളുടെ ഉത്തരവാദിത്തം ആരുമേറ്റിട്ടില്ല.
അമേരിക്ക കൊടുംകുറ്റവാളിപ്പട്ടികയിൽ പെടുത്തി തലയ്ക്ക് വിലയിട്ട ആളാണ് ഖൊറസാനി. പാക്ക് സർക്കാരുമായി ടിടിപിയെ സമാധാനചർച്ചയിൽ ഏർപ്പെട്ടിരിക്കുന്ന സമയത്താണ് നേതാവിന്റെ കൊലപാതകം എന്നതും ശ്രദ്ധേയമാണ്.
