കൊച്ചി> നയതന്ത്ര ബാഗേജ് വഴി സ്വർണം കടത്തിയ കേസിലെ പ്രധാന പ്രതി സ്വപ്ന സുരേഷിന് സിബിഐ നോട്ടീസ്. വടക്കാഞ്ചേരി ഫ്ലാറ്റ് നിർമ്മാണവുമായി ബന്ധപ്പെട്ട കേസിൽ ചോദ്യം ചെയ്യുന്നതിന് തിങ്കൾ രാവിലെ 10.30ന് ഹാജരാകാനാണ് സിബിഐ ആവശ്യപ്പെട്ടിരിക്കുന്നത്. കൊച്ചി സിബിഐ ഓഫീസിലാണ് ചോദ്യം ചെയ്യൽ.
കേസിലെ പ്രതി സരിത്തിനെ സിബിഐ മുമ്പ് ചോദ്യം ചെയ്തിരുന്നു. സരിത്തിന് വീണ്ടും നോട്ടീസ് നൽകുമെന്നും സൂചനയുണ്ട്. വടക്കാഞ്ചേരിയിൽ നിർമിക്കുന്ന ഫ്ലാറ്റ് സമുച്ചയത്തിന്റെ നിർമാണ കരാർ തന്റെ സ്ഥാപനമായ യൂണിടാക്കിന് ലഭിക്കാൻ യുഎഇ കോൺസുലേറ്റ് പ്രതിനിധിക്ക് കമീഷൻ നൽകിയതായി സന്തോഷ് ഈപ്പൻ സമ്മതിച്ചിരുന്നു. സന്തോഷ് ഈപ്പനെ പിന്നീട് സിബിഐ അറസ്റ്റ് ചെയ്തിരുന്നു.
അതേ സമയം സരിത്തിനെ ഇഡി കള്ളപണക്കേസിൽ വെള്ളിയാഴ്ച ചോദ്യം ചെയ്തു. രാവിലെ 11.30ന് ആരംഭിച്ച ചോദ്യം ചെയ്യൽ വൈകിട്ടു വരെ നീണ്ടു. ബുധനാഴ്ച സ്വപ്നയോടും സരിത്തിനോട് ഹാജരാകാൻ ഇഡി ആവശ്യപ്പെട്ടിരുന്നു. ആരോഗ്യ പ്രശ്നങ്ങളുള്ളതിനാൽ ഹാജരാകാനാവില്ലെന്നാണ് സ്വപ്ന അറിയിച്ചത്. സ്വപ്നയെ ആശുപത്രിയിൽ കൊണ്ടു പോകേണ്ടതിനാൽ എത്താനാവില്ലെന്ന് സരിത്ത് ഇഡിയെ ഇ–മെയിലിൽ അറിയിച്ചിരുന്നു.
