കൊല്ലം> പാലക്കാട്ട് ചേർന്ന യൂത്ത്കോൺഗ്രസ് സംസ്ഥാന പഠനക്യാമ്പിൽ സംസ്ഥാന നേതാവ് പീഡിപ്പിക്കാൻ ശ്രമിച്ചെന്ന പരാതിയുമായി ജില്ലാ ഭാരവാഹി. യൂത്ത് കോൺഗ്രസ് തിരുവനന്തപുരം ജില്ലാ ഭാരവാഹിയായ യുവതിയാണ് സംസ്ഥാന എക്സിക്യൂട്ടീവ് അംഗത്തിനെതിരെ ദേശീയ സെക്രട്ടറി പുഷ്പലതയ്ക്ക് പരാതി നൽകിയത്. പരാതിയുടെ പകർപ്പ് സംസ്ഥാന പ്രസിഡന്റ് ഷാഫി പറമ്പിലിനും അയച്ചു.
കഴിഞ്ഞ രണ്ടിന് വൈകിട്ടാണ് പരാതിക്ക് ആധാരമായ സംഭവം. ക്യാമ്പ് നടന്ന ഹാളിലെ വാഷ്റൂമിൽ വച്ചായിരുന്നു പീഡനശ്രമമെന്ന് പരാതിയിൽ പറയുന്നു. നേതാവ് മദ്യപിച്ചിരുന്നതായും പരാതിയിലുണ്ട്. നേതാവിനെ അനുകൂലിക്കുന്നവർ പരാതിക്കാരിയുമായി ഒത്തുതീർപ്പിനു ശ്രമിക്കുന്ന ഓഡിയോ ക്ലിപ്പ് പുറത്തായി. അതോടെ പരാതി ഒതുക്കിത്തീർത്തതായാണ് സൂചന. പരാതി ലഭിച്ചിട്ടില്ലെന്നായിരുന്നു ദേശീയസെക്രട്ടറിയുടെ പ്രതികരണം. സംസ്ഥാന പ്രസിഡന്റ് മറുപടി നൽകുമെന്നും പറഞ്ഞു.
