ബർമിങ്ഹാം> ഏകദിനശൈലിയിൽ പുറത്താവാതെ ജോ റൂട്ടും (142) ജോണി ബെയർസ്റ്റോയും (114) തകർത്തടിച്ചതോടെ അഞ്ചാം ടെസ്റ്റിൽ ഇംഗ്ലണ്ടിന് മിന്നും ജയം. ഇന്ത്യ മൂന്നോട്ടുവച്ച 378 റൺസെന്ന വൻ വിജയലക്ഷ്യം ഏഴ് വിക്കറ്റ് ശേഷിക്കെ ഇംഗ്ലണ്ട് മറികടന്നു. സ്കോർ– ഇന്ത്യ– 416, 245; ഇംഗ്ലണ്ട് 284, 378–3. ഇതോടെ പരമ്പര ഇംഗ്ലണ്ട് സമനിലയിലാക്കി.
109 റൺസിനു 3 വിക്കറ്റുകൾ എന്ന നിലയിൽ പരുങ്ങലിലായ ഇംഗ്ലണ്ടിനെ 4–ാം വിക്കറ്റിൽ ഒന്നിച്ച റൂട്ട്– ബെയർസ്റ്റോ സഖ്യം 316 പന്തിൽ 269 റൺസെടുത്താണ് വിജയത്തിലെത്തിച്ചത്. 2 ഇന്നിങ്സിലും സെഞ്ചുറി നേടിയ ജോണി ബെയർസ്റ്റോയാണു പ്ലെയർ ഓഫ് ദ് മാച്ച്. പരമ്പരയിൽ 23 വിക്കറ്റെടുത്ത ഇന്ത്യൻ ക്യാപ്റ്റൻ ജസ്പ്രീത് ബുമ്രയും, 737 റൺസെടുത്ത ഇംഗ്ലണ്ട് മുൻ നായകൻ ജോ റൂട്ടുമാണ് പരമ്പരയിലെ താരങ്ങൾ.
