മലയാളത്തിന്റെ സ്വന്തം മമ്മൂട്ടിയുടെ നിരവധി ചിത്രങ്ങൾ സോഷ്യൽമീഡിയയിൽ ഈ അടുത്തിടെ വൈറലായിട്ടുണ്ട്. സിനിമാ ലൊക്കേഷനുകളിൽ നിന്നുള്ളതും ഏതെങ്കിലും സ്വകാര്യ ചടങ്ങിൽ നിന്നുള്ളതും അദ്ദേഹം തന്നെ സോഷ്യൽമീഡിയയിൽ പങ്കുവയ്ക്കുന്നതുമടക്കം നിരവധി ചിത്രങ്ങൾ അക്കൂട്ടത്തിലുണ്ട്. ഇപ്പോഴിതാ അദ്ദേഹത്തിന്റെ അപൂർവ്വശൈലിയിലുള്ളൊരു ചിത്രം ഇപ്പോൾ വൈറലായിരിക്കുകയാണ്. കൊരിച്ചൊരിയുന്ന മഴയത്ത് ഒരു കുടുംബത്തെ തന്റെ കുടക്കീഴിൽ ചേർത്തുനിർത്തിയ അദ്ദേഹത്തിന്റെ ചിത്രമാണ് ഇപ്പോൾ സോഷ്യൽമീഡിയയിൽ ചർച്ചയായിരിക്കുന്നത്.
ആലുവ രാജഗിരി ആശുപത്രിയും കെയർ ആൻഡ് ഷെയർ ഇന്റർനാഷണൽ ഫൗണ്ടേഷനും സംയുക്തമായി സംഘടിപ്പിക്കുന്ന സൗജന്യ ഹൃദയ വാൽവ് മാറ്റിവക്കൽ ശസ്ത്രക്രിയാ പദ്ധതിയായ ‘ഹൃദ്യം’ പദ്ധതിയുടെ ഉദ്ഘാടനവും മമ്മൂട്ടി നേതൃത്വം കൊടുക്കുന്ന ജീവകാരുണ്യ സംഘടനയായ കെയർ ആൻഡ് ഷെയർ ഇന്റർനാഷണൽ ഫൗണ്ടേഷന്റെ പന്ത്രണ്ടാം വാർഷികവും കഴിഞ്ഞ ദിവസമാണ് കൊച്ചിയിൽ നടന്നത്.
നാട്ടിലെത്തുമ്പോൾ കുടുംബവുമൊത്ത് കാണാൻ വരണമെന്ന് മമ്മൂക്ക പറഞ്ഞിട്ടുള്ളതിനാൽ പിറ്റേന്ന് തന്നെ റോബർട്ട് ഭാര്യ ഗീതു, മക്കൾ നോവ, ഇമ്മാനുവേൽ എന്നിവരോടൊപ്പം കളമശ്ശേരി ഫാക്ടിലെ ‘റൊഷാക്ക്’ സിനിമയുടെ ലൊക്കേഷനിൽ എത്തി. പെട്ടെന്ന് പെയ്ത മഴയിൽ മമ്മൂക്ക തന്റെ വലിയ കുട നിവർത്തി ഇവരെ തന്റെ കുടക്കീഴിൽ ചേർത്തു നിർത്തുകയായിരുന്നു. ‘ഡാ, അവരെ നനക്കല്ലേ ഇനി പനിയൊക്കെ പിടിപ്പിച്ചാൽ വല്ല്യ പണിയാ.. നിങ്ങൾ വാ..എന്റെ കുടയിലേക്ക് കേറി നിൽക്ക്’, എന്നു പറഞ്ഞുകൊണ്ടായിരുന്നു മമ്മൂക്ക കുട നിവർത്തിയത്. അതിനിടയിൽ പ്രശസ്ത സിനിമ സ്റ്റിൽ ഫോട്ടോഗ്രാഫർ ശ്രീനാഥ് ഈ ചിത്രം പകർത്തുകയുമായിരുന്നു.
മമ്മൂട്ടി ഫാൻസ് ആൻഡ് വെൽഫെയര് അസോസിയേഷന്റെ ഇന്റര്നാഷണലിന്റെ പ്രസിഡന്റും അദ്ദേഹത്തിന്റെ ജീവകാരുണ്യ പ്രവർത്തനങ്ങളുടെ പിആർഒയും കെയര് ആൻഡ് ഷെയര് ഇന്റര്ണാഷണൽ ഫൗണ്ടേഷന്റെ ഡയറക്ടര് ബോര്ഡ് അംഗങ്ങളിൽ ഒരാളുമായ റോബര്ട്ട് കുര്യാക്കോസ് ഏറെ നാളുകൾക്ക് ശേഷം ഓസ്ട്രേലിയയിൽ നിന്നും ഈ ചടങ്ങിന്റെ ഭാഗമായി എത്തിയിരുന്നു. കോട്ടയം പള്ളിക്കത്തോട് സ്വദേശിയായ റോബർട്ടിന്, കൊവിഡ് തുടങ്ങിയ ശേഷം അന്താരാഷ്ട്ര അതിര്ത്തി അടച്ചിരുന്നതിനാൽ കുറച്ചുനാളായി നാട്ടിൽ എത്താൻ കഴിഞ്ഞിരുന്നില്ല. കുടുംബസമേതമാണ് റോബർട്ട് ഹൃദ്യം ചടങ്ങിനായി എത്തിയിരുന്നത്. പരിപാടി കഴിഞ്ഞപ്പോൾ കുടുംബത്തെ കുറിച്ച് മമ്മൂട്ടി റോബർട്ടിനോട് ചോദിച്ചെങ്കിലും പക്ഷേ ചടങ്ങിനിടയിലെ തിരക്കിനിടയിൽ അദ്ദേഹത്തിനടുത്തെത്താൻ കഴിഞ്ഞില്ല.
കുറച്ചുനാൾ മുമ്പ് കെയര് ആൻഡ് ഷെയര് ഇന്റര്നാഷണല് ഫൗണ്ടേഷന്റെ പത്താം വാര്ഷികാഘോഷവും മമ്മൂട്ടിയുടെ പിറന്നാളാഘോഷവും നടക്കുന്ന വേദിയിൽ കാണികളുടെ ഇടയിൽ നിന്നും ഒരു കുട്ടി മമ്മൂക്കാ… എന്ന് നീട്ടി വിളിച്ചത് വാർത്താ പ്രധാന്യം നേടിയിരുന്നതാണ്. വേദിയിൽ നിന്നും പോകുമ്പോൾ മമ്മൂക്ക ആ കുഞ്ഞിന് അടുക്കൽ ചെന്ന് കുഞ്ഞിനെ ലാളിക്കുന്ന ചിത്രവും സോഷ്യൽമീഡിയ ഏറ്റെടുത്തിരുന്നതാണ്. റോബര്ട്ട് കുര്യാക്കോസിന്റെ മകന് നോവയായിരുന്നു അന്ന് മമ്മൂക്കാ…എന്ന് നീട്ടി വിളിച്ച കുട്ടി. മുമ്പും ഓസ്ട്രേലിയയിൽ നിന്നും നാട്ടിലെത്തുമ്പോൾ റോബർട്ടും കുടുംബവും മമ്മൂക്കയെ നേരിൽ കാണാനെത്തിയിട്ടുണ്ട്
