ന്യൂഡൽഹി > സാമ്പത്തിക തട്ടിപ്പ് കേസുമായി ബന്ധപ്പെട്ട് പാലാ എംഎല്എ മാണി സി കാപ്പന് സുപ്രീംകോടതി നോട്ടീസ്. മുംബൈ വ്യവസായി ദിനേശ് മേനോന് നല്കിയ ഹര്ജിയിലാണ് നോട്ടീസ് നൽകിയിരിക്കുന്നത്. ചീഫ് ജസ്റ്റിസ് എന് വി രമണ അധ്യക്ഷനായ ബഞ്ചാണ് നോട്ടീസ് അയച്ചത്.
കണ്ണൂര് വിമാനത്താവളത്തിന്റെ ഓഹരി നല്കാമെന്ന് വാഗ്ദാനം നല്കി 3.25 കോടി രൂപ തട്ടി എന്ന ദിനേശ് മേനോന്റെ പരാതിയില് എറണാകുളം ജുഡീഷ്യല് മജിസ്ട്രേറ്റ് ഫസ്റ്റ് ക്ലാസ് കോടതി കേസ് രജിസ്റ്റര് ചെയ്തിരുന്നു. വഞ്ചന, ഗൂഢാലോചന എന്നീ കുറ്റങ്ങള് ചുമത്തിയാണ് കേസ് എടുത്തത്. എന്നാൽ ഈ കേസിലെ നടപടികൾ ഹൈക്കോടതി സ്റ്റേ ചെയ്തു. ഈ സ്റ്റേ നീക്കണമെന്ന് ആവശ്യപ്പെട്ടു ദിനേശ് മേനോൻ സുപ്രീം കോടതിയിൽ നൽകിയ ഹർജിയിലാണ് ഇപ്പോൾ നോട്ടീസ് അയച്ചത്.
