ചുങ്കത്തറ പഞ്ചായത്തിൽ യുഡിഎഫ്‌ പുറത്ത്‌ ; അവിശ്വാസം പാസായി

എടക്കര> ചുങ്കത്തറ പഞ്ചായത്തിൽ പ്രസിഡൻ്റിനെതിരെ എൽഡിഎഫ് കൊണ്ടുവന്ന അവിശ്വാസം പാസായി. യുഡിഎഫ് പ്രസിഡൻ്റായിരുന്ന വത്സമ്മ സെബാസ്റ്റ്യനാണ് അവിശ്വാസ പ്രമേയത്തിലൂടെ പുറത്തായത്.

20 അംഗ ഭരണ സമിതിയിൽ യുഡിഎഫിനും, എൽഡിഎഫിനും 10 വീതം അംഗങ്ങളാണുണ്ടായിരുന്നത്. 11 അംഗങ്ങൾ അവിശ്വസത്തെ അനുകൂലിച്ചും, 9 അംഗങ്ങൾ എതിർത്തും വോട്ട് രേഖപ്പെടുത്തി. ചുങ്കത്തറ പഞ്ചായത്ത് വാർഡ് 14 കളക്കുന്ന് സ്വതന്ത്ര അംഗം നജ്മുന്നീസ പ്രസിഡൻ്റിനെതിരായ അവിശ്വാസത്തിൽ ഉറച്ച് നിന്ന് വോട്ട് രേഖപ്പെടുത്തി. തിങ്കളാഴ്ച്ച രാവിലെ പഞ്ചായത്ത് ഹാളിലാണ് അവിശ്വാസ പ്രമേയ ചർച്ച നടന്നത്.

നിലമ്പൂർ ബ്ലോക്ക് ഡെവലപ്മെൻ്റ് ഓഫീസർ ഏ ജെ സന്തോഷായിരുന്നു വരണാധികാരി. മാർച്ച് 23നാണ് എൽഡിഎഫിലെ 10 അംഗങ്ങൾ ഒപ്പ് വെച്ച് അവിശ്വാസത്തിന് നോട്ടീസ് നൽകിയത്. സിപിഐ എം 10, കോൺഗ്രസ് 7, മുസ്ലീംലീഗ് സ്വതന്ത്ര അടക്കം 3 എന്നിങ്ങനെയാണ് പഞ്ചായത്തിലെ കക്ഷിനില.