അപൂർവങ്ങളിൽ അപൂർവമായ ഈ അവസ്ഥ അഭിമുഖീകരിക്കുകയാണ് 1 വയസ്സുള്ള ലോക്ക്‌ലാൻ. എന്നാൽ ഈ മെഡിക്കൽ കണ്ടിഷനിൽ വിഷമിക്കുന്നില്ല തങ്ങൾ എന്ന് ലോക്ക്‌ലാൻ്റെ കുടുംബം വ്യക്തമാക്കുന്നു. “എന്തുകൊണ്ടാണ് അവന് (കുട്ടിയ്ക്ക്) ഈ അവസ്ഥ ഉണ്ടായത് എന്ന് ഞങ്ങൾക്ക് ഒരു സൂചനയും ഇല്ല, പക്ഷേ അവനും ഞങ്ങളും അതിൽ വിഷമിക്കുന്നില്ല,” ലോക്ക്‌ലാൻ്റെ അമ്മ കാറ്റ്ലിൻ സാമ്പിൾസ് ജാം പ്രസ്സിനോട് പറഞ്ഞു.
അമേരിക്കയിലെ അറ്റ്‌ലാന്റയിലെ താമസക്കാരായ കാറ്റ്‌ലിനും അവളുടെ ഭർത്താവ് കാലേബും, ലോക്ക്‌ലാന് 5 മാസം പ്രായമുള്ളപ്പോഴാണ് മുടിക്ക് എന്തോ കുഴപ്പമുണ്ടെന്ന് ആദ്യം ശ്രദ്ധിച്ചത്. മുടി ഒരു തരത്തിലും മടങ്ങിയിരിക്കില്ല എന്നും ചീപ്പുകൊണ്ട് ചീകിവയ്ക്കാൻ പോലും സാധിക്കാത്ത വിധം മുടി നേരെ നിൽക്കുന്നതാണ് ‘പ്രശ്നം’.
ഇൻസ്റ്റാഗ്രാമിൽ തന്റെ കുഞ്ഞുമായി പോസ്റ്റ് ചെയ്ത ചിത്രത്തിന് കീഴെ ഒരു അപരിചിതൻ കുഞ്ഞിന് “അൺകോമ്പബിൾ ഹെയർ സിൻഡ്രോം” ഉണ്ടോ എന്ന് ചോദിച്ചപ്പോഴാണ് അതേപടി താൻ അന്വേഷിക്കാൻ തുടങ്ങിയത് എന്ന് കാറ്റ്ലിൻ പറയുന്നു. ഗൂഗിളിൽ ഏറെ തിരഞ്ഞതോടെ മുടിയിലെ ഘടനാപരമായ അപാകത അതിനെ പരന്നതോ ചീകാൻ പറ്റാത്തതോ ആക്കുന്ന ഒരു ജനിതക അവസ്ഥയാണെന്ന് കാറ്റ്ലിൻ മനസ്സിലാക്കി.
ലോക്ക്‌ലാന്റെ മുടിയുടെ സാമ്പിളുകൾ എടുത്ത ഡോക്ടർമാർ, പിന്നീട് കുട്ടിക്ക് UHS തന്നെയെന്ന് സ്ഥിരീകരിച്ചു. UHS സാധാരണയായി 3 മാസം മുതൽ 3 വയസ്സ് വരെ പ്രായമുള്ള കുട്ടികളെയാണ് ബാധിക്കുന്നത്. ഇതുവരെ 100 കേസുകൾ മാത്രമേ റിപ്പോർട്ട് ചെയ്യപ്പെട്ടിട്ടുള്ളൂ. എന്നാൽ ചിലത് റിപ്പോർട്ട് ചെയ്യപ്പെടാത്തവയായിരിക്കുമെന്ന് മെഡിക്കൽ വിദഗ്ധർ വിശ്വസിക്കുന്നു.
“ലോക്ക്‌ലാന്റെ മുടിയുടെ ഈ അവസ്ഥ ഒരു രോഗമല്ല എന്ന് മനസ്സിലാക്കിയതോടെ മാതാപിതാക്കളുടെ ആവലാതി മാറി. “അലങ്കോലവും, നേരെ നിൽക്കുന്നതുമായ മുടി ഒഴികെ അവൻ തികച്ചും ആരോഗ്യവാനും വളരെ സന്തുഷ്ടനുമാണ്! അവന്റെ തലമുടി അധികം കഴുകേണ്ടതില്ല… ആഴ്ചയിലൊരിക്കൽ മാത്രം” കാറ്റ്ലിൻ പറയുന്നു.
വാസ്തവത്തിൽ ലോക്ക്‌ലന്റെ വ്യത്യസ്തമായ മുടി അവനെ ഒരു സെലിബ്രിറ്റി ആക്കി മാറ്റിയിട്ടുണ്ട്. പുറത്ത് പോകുമ്പോൾ നിരവധിപേർ സെൽഫിയെടുക്കാൻ വരാറുണ്ട് എന്ന് ‘അമ്മ പറയുന്നു.
