സിനിമകളിലെ ഹൃദയഹാരിയായ കഥാപാത്രങ്ങളിലൂടെ കെ പി എ സി ലളിത നമുക്കെല്ലാം ചിരപരിചിതയായിരുന്നു. അവരുടെ നാടകകാലവും അവിസ്മരണീയമാണ്. സംഗീത നാടക അക്കാദമി അധ്യക്ഷയെന്നുള്ള നിലയിലും മികച്ച അടയാളപ്പെടുത്തലുകൾ ആ കലാകാരിയുടെ ഭാഗത്തുനിന്നുമുണ്ടായി.
Also Read :
അപരനോടുള്ള സ്നേഹവും സമൂഹത്തോടുള്ള പ്രതിബദ്ധതയും ഉയർത്തിപ്പിടിച്ച കെ പി എ സി ലളിതയുടെ വിയോഗം ഏറെ വേദനിപ്പിക്കുന്നതാണ്. കുടുംബാംഗങ്ങളുടേയും സഹപ്രവർത്തകരുടെയും ദുഖത്തിൽ പങ്കുചേരുന്നെന്നും കോടിയേരി ബാലകൃഷ്ണൻ പറഞ്ഞു.
മലയാള ചലച്ചിത്ര രംഗത്തെ അതുല്യ പ്രതിഭയെയാണ് കെ പി എ സി ലളിതയുടെ നിര്യാണത്തിലൂടെ നഷ്ടമായിരിക്കുന്നതെന്ന് മുഖ്യമന്ത്രി പിണറായി വിജയനും അനുശോചിച്ചു. ‘വ്യത്യസ്ത തലമുറകളുടെ ഹൃദയങ്ങളിലേക്ക് അഭിനയ പാടവം കൊണ്ട് ചേക്കേറിയ അവർ ഒരു കാലഘട്ടത്തിന്‍റെയാകെ ചരിത്രത്തിന്‍റെ ഭാഗമായി സ്വയം മാറി. നാടകങ്ങളിൽ തുടങ്ങി ചലച്ചിത്രങ്ങളിലൂടെ മലയാളികളുടെ കുടുംബാംഗമായി മാറിയതാണ് ആ അഭിനയജീവിതം.’
‘സാമൂഹ്യ പ്രതിബദ്ധത കൊണ്ടും സാമൂഹികമായ ഇടപെടലുകൾ കൊണ്ടും അവർ മനുഷ്യ മനസ്സുകളിൽ ഇടം നേടി. പുരോഗമന പ്രസ്ഥാനത്തോട് എന്നും കൈകോർത്തു നിന്ന സംഗീത നാടക അക്കാദമി അധ്യക്ഷ എന്ന നിലയിലും മികച്ച പ്രവർത്തനമാണ് കാഴ്ചവെച്ചത്. കുടുംബാംഗങ്ങളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നു.’ മുഖ്യമന്ത്രി ഫേസ്ബുക്കിൽ കുറിച്ചു.
Also Read :
കരൾരോഗം ബാധിച്ച് ദീർഘനാളായി ചികിത്സയിലായിരുന്ന കെ പി എ സി ലളിത ഇന്നലെ രാത്രിയാണ് അന്തരിച്ചത്. തൃപ്പൂണിത്തുറയിൽ മകനും നടനും സംവിധായകനുമായ സിദ്ധാർഥ് ഭരതന്‍റെ ഫ്ലാറ്റിലായിരുന്നു അന്ത്യം. ഇന്ന് വൈകീട്ട് വടക്കാഞ്ചേരിയിലെ വീട്ടുവളപ്പിൽ സംസ്കാരം നടത്തും.
നാടകത്തിലൂടെ സിനിമാ രംഗത്തേക്ക് എത്തിയ ലളിത മലയാളത്തിലും തമിഴിലുമായി അഞ്ഞൂറിലേറെ സിനിമകളിൽ അഭിനയിച്ചിട്ടുണ്ട്. മികച്ച സഹനടിക്കുള്ള ദേശീയ ചലച്ചിത്ര പുരസ്കാരം രണ്ടുവട്ടം സ്വന്തമാക്കിയ അവർ നാല് പ്രാവശ്യം സംസ്ഥാന ചലച്ചിത്ര പുരസ്കാരത്തിന് അർഹയായി. കേരള സംഗീത നാടക അക്കാദമിയുടെ ചെയർപേഴ്സനായിരുന്നു കെ പിഎസി ലളിത. പ്രശസ്ത സംവിധായകൻ ഭരതനാണ് ഭർത്താവ്. സിദ്ധാർഥിന് പുറമെ ശ്രീക്കുട്ടി എന്ന മകളും കെ പി എ സി ലളിതയ്ക്കുണ്ട്.
