തിരുവനന്തപുരം> പ്രാണ– ദേശാഭിമാനി അക്ഷരമുറ്റം ക്വിസ് ഫെസ്റ്റിവൽ സീസൺ–-10 മെഗാ ഫൈനൽ ഞായറാഴ്ച നടക്കും. തിരുവനന്തപുരം തൈക്കാട് ഗവ. മോഡൽ ബോയ്സ് എച്ച്എസ്എസിൽ രാവിലെ 9.15ന് വിദ്യാഭ്യാസമന്ത്രി വി ശിവൻകുട്ടി ഉദ്ഘാടനംചെയ്യും. ദേശാഭിമാനി ജനറൽ മാനേജർ കെ ജെ തോമസ്, സിപിഐ എം ജില്ലാ സെക്രട്ടറി ആനാവൂർ നാഗപ്പൻ, കെഎസ്ടിഎ സംസ്ഥാന ജനറൽ സെക്രട്ടറി എൻ ടി ശിവരാജൻ തുടങ്ങിയവർ പങ്കെടുക്കും.
ജില്ലാതല വിജയികളായ 56 കുട്ടികളാണ് മത്സരത്തിൽ പങ്കെടുക്കുന്നത്. കോവിഡ് മാനദണ്ഡം പാലിച്ച് എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗമായാണ് മത്സരം. രാവിലെ 8.30ന് രജിസ്ട്രേഷൻ ആരംഭിക്കും. വിവിധതലങ്ങളിലെ വിജയികൾക്ക് ഒരുകോടി രൂപയുടെ ക്യാഷ് അവാർഡാണ് നൽകുക. മികച്ച പ്രകടനം കാഴ്ച വയ്ക്കുന്ന 2000 വിദ്യാർഥികൾക്ക് ഒരു കോടി രൂപയുടെ പ്രാണ ലേണിങ് ആപ്പും സമ്മാനമായി ലഭിക്കും. പ്രാണ ഇൻസൈറ്റാണ് അക്ഷരമുറ്റത്തിന്റെ പ്രധാന സ്പോൺസർ.
