തിരുവനന്തപുരം: ഹിജാബ് വിഷയത്തിലെ ഗവർണർ ആരിഫ് മുഹമ്മദ് ഖാന്റെ പരാമർശത്തിനെതിരേമുസ്ലിം ലീഗ് ഉന്നതാധികാര സമിതിയംഗം സാദിഖലി ശിഹാബ് തങ്ങൾ. ഗവർണർ നേരത്തേയും ശരീഅത്ത് നിയമങ്ങൾക്കെതിരേ നിലപാടെടുത്തിട്ടുണ്ട്.അദ്ദേഹത്തിൽനിന്ന് കൂടുതലൊന്നും പ്രതീക്ഷിക്കുന്നില്ല. മൗലിക അവകാശങ്ങൾക്കെതിരേയുള്ള കടന്നുകയറ്റമാണ് നടക്കുന്നതെന്നും സാദിഖലി ശിഹാബ് തങ്ങൾ പറഞ്ഞു.
ഹിജാബിനെതിരേയുള്ള കയ്യേറ്റമായി മാത്രം ഇതിനെ കാണേണ്ടതില്ല. മതം, വിദ്യാഭ്യാസം, വസ്ത്രം എന്നിങ്ങനെ ഭരണഘടന ഉറപ്പ് നൽകുന്ന സ്വാതന്ത്ര്യങ്ങൾക്കെതിരേയുള്ള കടന്നുകയറ്റമാണിത്. ഹിജാബ് വിഷയത്തെ മതവിഷയമായി മാത്രം ഒതുക്കേണ്ടതില്ലെന്നും അദ്ദേഹം പറഞ്ഞു.
ഹിജാബ് വിവാദത്തിന് പിന്നിൽ മുസ്ലിം പെൺകുട്ടികളെ മുഖ്യധാരയിൽ നിന്ന് മാറ്റിനിർത്താനുള്ള ഗൂഢാലോചന ആണെന്നായിരുന്നു ഗവർണർ ആരിഫ് മുഹമ്മദ് ഖാന്റെ പരാമർശം. ഇസ്ലാം മതവിശ്വാസപ്രകാരം ഹിജാബ് ഒഴിവാക്കാനാവാത്ത ആചാരമല്ല. വിദ്യാഭ്യാസ സ്ഥാപനങ്ങളിലെ നിയമങ്ങൾ പാലിക്കപ്പെടണം. അത് വസ്ത്ര സ്വാതന്ത്ര്യം നിഷേധിക്കലല്ല. സിഖുകാരുടെ തലപ്പാവുമായി ഹിജാബ് താരതമ്യം ചെയ്യുന്നത് ശരിയല്ലെന്നും അദ്ദേഹം പറഞ്ഞിരുന്നു.
