തിരുവനന്തപുരം > ബിജെപി തോറ്റാൽ ഉത്തർപ്രദേശ് കേരളമാകുമെങ്കിൽ ജനങ്ങൾ അതിന് തയ്യാറാകണമെന്ന് സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണൻ. അങ്ങനെ സംഭവിക്കണമെന്നാണ് സിപിഐ എം ആഗ്രഹിക്കുന്നത്. യോഗിയുടെ വിശകലനം പ്രാവർത്തികമാക്കാൻ യുപിയിലെ തെരഞ്ഞെടുപ്പിൽ ജനങ്ങൾ ഇത്തവണ ബിജെപിയെ തോൽപ്പിക്കണം. അങ്ങനെ സംഭവിച്ചാൽ ഉത്തർപ്രദേശിലെ ജനങ്ങൾക്ക് അത് വലിയ നേട്ടമായിരിക്കുമെന്നും കോടിയേരി പറഞ്ഞു.
ജനധിപത്യവും മതനിരപേക്ഷതയും സംരക്ഷിക്കാൻ കഴിയാത്ത ഭരണമാണ് യു.പിയിൽ ഉള്ളത്. അതിക്രമങ്ങൾ വർധിച്ചുവരുന്ന സംസ്ഥാനമാണത്. ഭരണമികവിലും, ആരോഗ്യസൂചികയിലും, സുസ്ഥിര വികസന സൂചികയിലുമെല്ലാം കേരളം ഒന്നാമതാണ്. യുപി ഏറ്റവും പിന്നിലാണുള്ളത്. സ്ത്രീ സാക്ഷരതയിലും, ആയുർ ദൈർഘ്യത്തിലും കേരളം മുന്നിലാണ്. ഉത്തർപ്രദേശിലെ ജനങ്ങൾക്ക് ആയുർദൈർഘ്യം വർധിക്കണമെങ്കിൽ ബിജെപിയെ തോൽപ്പിക്കണം. ഈ രാഷ്ട്രീയ വിവാദങ്ങൾ യു.പിയിലെ തെരഞ്ഞെടുപ്പിൽ പ്രതിഫലിക്കണമെന്നാണ് ആഗ്രഹിക്കുന്നത്. യോഗിയെ തിരുത്താൻ കേരളത്തിലെ ബിജെപിക്കാർ രംഗത്തുവരണമെന്നും കോടിയേരി പറഞ്ഞു.
