കോട്ടയം> പാമ്പുകടിയേറ്റ് കോട്ടയം മെഡിക്കല് കോളേജില് ചികിത്സയില് കഴിയുന്ന വാവ സുരേഷിന്റെ ആരോഗ്യനിലയില് മികച്ച പുരോഗതി. തലച്ചോറിന്റെ പ്രവര്ത്തനം നിലവില് സാധാരണനിലയിലാണെന്ന് ഡോക്ടര്മാര് അറിയിച്ചു. സാധാരണഗതിയില് ശ്വാസം എടുക്കുന്നുണ്ട്. കാര്യങ്ങളും ഓര്മിച്ച് പറയുന്നുണ്ട്.
ഇന്നുമുതല് ലഘുഭക്ഷണങ്ങള് നല്കിത്തുടങ്ങും. അവയവങ്ങള് കൂടുതല് ചലനശേഷി കൈവരിച്ചതായും ഡോക്ടര്മാര് അറിയിച്ചു. എഴുന്നേല്പ്പിച്ച് നടത്തിയേക്കും. ആരോഗ്യ നിലയില് പുരോഗതിയുള്ളതിനാല് ഐസിയുവില് നിന്ന് ഇന്ന് മാറ്റാന് സാധ്യതയുണ്ട്. മെഡിക്കല് ബോര്ഡ് ചേര്ന്ന് ഇക്കാര്യത്തില് തീരുമാനമെടുക്കും.
കഴിഞ്ഞ ദിവസം നീലംപേരൂര് വെച്ചായിരുന്നു വാവ സുരേഷിനെ മൂര്ഖന് പാമ്പ് കടിച്ചത്. പിടികൂടിയ പാമ്പിനെ ചാക്കില് കയറ്റുന്നതിനിടെ തുടയില് കടിക്കുകയായിരുന്നു. ഗുരുതരാവസ്ഥയിലായ സുരേഷിനെ കോട്ടയത്തെ സ്വകാര്യ ആശുപത്രിയില് പ്രവേശിപ്പിച്ചെങ്കിലും പിന്നീട് കോട്ടയം മെഡിക്കല് കോളേജിലേക്ക് മാറ്റുകയ്യിരുന്നു. ന്യൂറോ, കാര്ഡിയാക് വിദഗ്ധര്മാര് അടങ്ങുന്ന ആറംഗ വിദഗ്ദ്ധ സംഘമാണ് വാവ സുരേഷിന്റെ ചികിത്സയ്ക്ക് മേല്നോട്ടം വഹിക്കുന്നത്.
