കൊവിഡ് വ്യാപനത്തിൽ കുറവ് രേഖപ്പെടുത്താൻ ആരംഭിച്ച തിരുവനന്തപുരം ഉൾപ്പെടെയുള്ള ജില്ലകളെ കനത്ത നിയന്ത്രണങ്ങളുള്ള സി കാറ്റഗറിയിൽ നിന്ന് മാറ്റുമോയെന്നതിലും ഇന്ന് തീരുമാനമാകും. നിലവിൽ തിരുവനന്തപുരം, ഇടുക്കി, പത്തനംതിട്ട, കൊല്ലം കോട്ടയം ജില്ലകളാണ് സി കാറ്റഗറിയിലുള്ളത്.
Also Read :
മൂന്നാം കൊവിഡ് തരംഗത്തിലൂടെ കടന്ന് പോകുന്ന സംസ്ഥാനത്ത് ആക്ടീവ് കേസുകളുടെ എണ്ണത്തിൽ ഇന്നലെ കുറവ് രേഖപ്പെടുത്തിയിരുന്നു. അതേസമയം ഞായറാഴ്ചകളിലെ നിയന്ത്രണത്തിൽ മാറ്റമുണ്ടാകില്ലെന്നാണ് റിപ്പോർട്ട്. വാരാന്ത്യ നിയന്ത്രണം തുടരാനായിരുന്നു കഴിഞ്ഞദിവസം ചേർന്ന കൊവിഡ് അവലോകന യോഗം തീരുമാനിച്ചത്.
അതേസമയം കേരളത്തിലെ കൊവിഡ് വ്യാപനത്തിൽ കേന്ദ്ര ആരോഗ്യ മന്ത്രാലയം ആശങ്ക അറിയിച്ചതായും റിപ്പോർട്ടുകളുണ്ട്. കേരളത്തിലും മിസോറാമിലും കൊവിഡ് പോസിറ്റിവിറ്റി നിരക്ക് കൂടുന്നതിലാണ് കേന്ദ്രം ആശങ്ക രേഖപ്പെടുത്തിയത്. കേരളത്തിലെ ടിപിആർ മൂന്നാഴ്ചയ്ക്കിടെ 13.3 ശതമാനത്തിൽ നിന്ന് 47 ശതമാനമായി ഉയർന്നുവെന്നാണ് കേന്ദ്രം ചൂണ്ടിക്കാട്ടുന്നത്.
Also Read :
സംസ്ഥാനത്ത് ഇന്നലെ 42,677 പേര്‍ക്കായിരുന്നു കൊവിഡ് 19 സ്ഥിരീകരിച്ചത് എറണാകുളം 7055, തിരുവനന്തപുരം 5264, കോട്ടയം 4303, കൊല്ലം 3633 എന്നിങ്ങനേയാണ് ജില്ലകളിലെ പുതിയ കേസുകൾ. വിവിധ ജില്ലകളിലായി 5,08,146 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 4,97,025 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്‍റൈനിലും 11,121 പേര്‍ ആശുപത്രികളിലും നിരീക്ഷണത്തിലാണ്. 1144 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്. രോഗം സ്ഥിരീകരിച്ച് ചികിത്സയിലായിരുന്ന 50,821 പേര്‍ രോഗമുക്തി നേടുകയും ചെയ്തിരുന്നു.
