ന്യൂഡൽഹി: കേരളത്തിന്റെ അഭിമാന പദ്ധതിയായ പദ്ധതിക്ക് ഇപ്പോൾ അനുമതി നൽകാൻ സാധിക്കില്ലെന്ന് കേന്ദ്രം. കേരളം നൽകിയ ഡിപിആർ പൂർണമല്ലെന്ന് വ്യക്തമാക്കിയാണ് കേന്ദ്രം നിലപാട് വ്യക്തമാക്കിയത്. സാങ്കേതികമായും സാമ്പത്തികമായും പദ്ധതി പ്രാവർത്തികമാണോയെന്ന് കേരളം വ്യക്തമാക്കിയിട്ടില്ലെന്നാണ് കേന്ദ്രം പറയുന്നത്. പരിസ്ഥിതി പഠനം നടത്തിയിട്ടില്ലെന്നും കേന്ദ്രം ചൂണ്ടിക്കാട്ടി.
കേരളത്തിൽ നിന്നുള്ള എംപിമാരായ എൻ കെ പ്രേമചന്ദ്രനും കെ മുരളീധരനും ലോക്സഭയിൽ ഉന്നയിച്ച ചോദ്യങ്ങൾക്ക് മറുപടി പറയുകയായിരുന്നു കേന്ദ്ര റെയിൽ വേ മന്ത്രി അശ്വിനി വൈഷ്ണവ്. ടെക്നിക്കൽ ഫീസിബിലിറ്റി റിപ്പോർട്ട് ഡിപിആറിൽ ഇല്ലെന്ന് മന്ത്രി പറഞ്ഞു.
ഏറ്റെടുക്കേണ്ട റെയിൽവേ, സ്വകാര്യ ഭൂമി എന്നിവയുടെ കണക്ക് കാണിക്കണം. പരിസ്ഥിതി പഠനം നടത്തണം. ഇവയൊക്കെ പരിശോധിച്ചതിനു ശേഷം മാത്രമേ പദ്ധതിക്ക് അനുമതി നൽകാനാകൂ എന്ന് മന്ത്രി പറഞ്ഞു.
എന്നാൽ മന്ത്രിയുടെ പ്രതികരണത്തെക്കുറിച്ച് അറിയില്ലെന്നും ഔദ്യോഗിക അറിയിപ്പ് ലഭിച്ചാൽ പ്രതികരിക്കാമെന്നുമാണ് കെ റെയിൽ അധികൃതരുടെ പ്രതികരണം. മാതൃഭൂമി ഡോട്ട് കോം റിപ്പോർട്ട് ചെയ്തു.
