വന്ദേഭാരത് ട്രെയിനുകൾ കെ റെയിലിനേക്കാൾ ചെലവ് കുറഞ്ഞതും ഊർജ്ജ-കാര്യക്ഷമമായതുമായ ഒരു ബദലാകുമോ എന്ന് നോക്കേണ്ടത് അത്യാവശ്യമാണെന്ന് ഫേസ്ബുക്ക് പോസ്റ്റിലൂടെയാണ് തരൂർ പറഞ്ഞത്. ഇന്നവതരിപ്പിക്കപ്പെട്ട കേന്ദ്ര ബജറ്റിൽ കേരളത്തെ സംബന്ധിച്ചിടത്തോളം ശ്രദ്ധേയമായത് മണിക്കൂറിൽ 180 കിലോമീറ്റർ വേഗതയുള്ള 400 പുതിയ വന്ദേഭാരത് ട്രെയിനുകളുടെ പ്രഖ്യാപനമാണെന്ന് പറഞ്ഞുകൊണ്ടാണ് തരൂർ തന്‍റെ നിലപാട് വ്യക്തമാക്കിയത്.
Also Read :
“കേന്ദ്ര സർക്കാരും സംസ്ഥാന സർക്കാരും ഈ പദ്ധതി ഇപ്പോൾ കേരളത്തിൽ പ്രഖ്യാപിച്ചിട്ടുള്ള സിൽവർലൈൻ പദ്ധതിയെക്കാൾ ചെലവ് കുറഞ്ഞതും ഊർജ്ജ-കാര്യക്ഷമമായതുമായ ഒരു ബദലാകുമോ എന്ന് നോക്കേണ്ടത് അത്യാവശ്യമാണ്.
വന്ദേ ഭാരത് ട്രെയിനുകളുടെ സേവനം കേരളത്തിന് ലഭിക്കുകയാണെങ്കിൽ കേരളത്തിന്‍റെ വികസനത്തിന് വേണ്ടി സംസ്ഥാനത്തിന്‍റെ ഒരറ്റത്ത് നിന്നും മറ്റേ അറ്റത്തേക്ക് വേഗതയുള്ള ഗതാഗത സൗകര്യം എന്ന സർക്കാരിന്‍റെ ആവശ്യകതക്കും അതേ സമയം പ്രതിപക്ഷത്തിന്‍റെ പ്രസ്തുത പദ്ധതിയുടെ സാമ്പത്തിക ബാധ്യത, ഭൂമി ഏറ്റെടുക്കൽ, പരിസ്ഥിതി ആഘാതവുമായി ബന്ധപ്പെട്ട ആശങ്കകൾക്കുള്ള പരിഹാരവുമായേക്കാം.” ശശി തരൂർ ഫേസ്ബുക്ക് പോസ്റ്റിലൂടെ പറഞ്ഞു.
Also Read :
നിലവിലെ റെയിൽപാത ഉപയോഗിച്ചു തന്നെ കൂടുതൽ വേഗത്തിൽ സര്‍വീസ് നടത്തുന്ന പുതിയ 400 വന്ദേ ഭാരത് ട്രെയിനുകള്‍ നിരത്തിലിറക്കാനാണ് കേന്ദ്രസര്‍ക്കാര്‍ പദ്ധതി ഇടുന്നത്. ഇന്നലെ കേന്ദ്ര ധനമന്ത്രി നിര്‍മല സീതാരാമൻ അവതരിപ്പിച്ച ബജറ്റിലാണ് ഇതുസംബന്ധിച്ച നിര്‍ദേശമുള്ളത്. പ്രധാന റൂട്ടുകളില്ലെല്ലാം കൂടുതൽ വേഗത്തിൽ മികച്ച സൗകര്യങ്ങളോടെ ട്രെയിനുകള്‍ എത്തുന്നതോടെ ഇന്ത്യൻ റെയിൽവേയുടെ മുഖം മാറുമെന്നാണ് അവകാശവാദം.
എന്നാൽ നാനൂറോളം വന്ദേ ഭാരത് ട്രെയിനുകള്‍ ട്രാക്കിലിറക്കുമെന്നു കേന്ദ്രം പറയുമ്പോഴും കേരളത്തിന് എത്രയെണ്ണം കിട്ടുമെന്ന് ഇതുവരെ വ്യക്തമല്ല. ഗോള്ഡൻ ക്വാഡ്രലാറ്ററൽ, ഗോള്ഡൻ ഡയഗണൽ റൂട്ടുകളിൽ ട്രെയിൻ സെറ്റുകള്‍ ഓടിത്തുടങ്ങുമെന്നാണ് റെയിൽവേയുടെ ഡ്രാഫ്റ്റ് പോളിസി പറയുന്നത്. ഇതിൽ കേരളമില്ല. കൂടാതെ ട്രാക്ക് ഇരട്ടിപ്പിക്കലിലെ മെല്ലെപ്പോക്ക് അടക്കം തുടരുന്ന സാഹചര്യത്തിൽ വേഗതയേറിയ ട്രെയിനുകള്‍ കിട്ടിയാലും കേരളത്തിലെ പാതകളിൽ വേഗമുണ്ടാകില്ലെന്നാണ് വിലയിരുത്തപ്പെടുന്നത്.
