കോഴിക്കോട്> തുടർച്ചയായ രണ്ടാം ദിവസവും നഗരത്തിൽ സിന്തറ്റിക് ലഹരി മരുന്നുവേട്ട. അഞ്ചുലക്ഷം രൂപയിലധികം വിലമതിക്കുന്ന സിന്തറ്റിക് ലഹരി വസ്തുക്കളുമായാണ് യുവാക്കളെ എക്സൈസ് സംഘം പിടികൂടിയത്. 25 വയസ്സ് പോലും തികയാത്ത യുവാക്കളാണ് മാരക മയക്കുമരുന്ന് വിപണനത്തിനിടെ പിടിയിലായത്.
ബ്ലൂടൂത്ത് സ്പീക്കറിനുള്ളിൽ എംഡിഎംഎ ഒളിപ്പിച്ച് കടത്തുന്നതിനിടെയാണ് കോവിഡ് നിയന്ത്രണങ്ങൾ നിലനിന്ന ഞായർ രാവിലെ വള്ളിക്കുന്ന്, മലാപ്പറമ്പ് സ്വദേശികളായ 22 വയസ്സുകാർ പിടിയിലായത്. എക്സൈസ് കമീഷണറുടെ ഉത്തരമേഖലാ സ്ക്വാഡും എക്സൈസ് ഇന്റലിജന്റ്സും ചേർന്ന് നടത്തിയ പരിശോധനയിലാണ് ഇരുവരും വലയിലായത്. ഡ്യൂക്ക് ബൈക്കിൽ ബ്ലൂടൂത്ത് സ്പീക്കറിൽ ഒളിപ്പിച്ചുകടത്തുകയായിരുന്ന 55 ഗ്രാം എംഡിഎംഎയ്ക്ക് വിപണിയിൽ മൂന്നുലക്ഷം രൂപ വിലമതിക്കും.
ഉത്തരമേഖലയിൽ ഈ വർഷം നടന്ന ഏറ്റവും വലിയ സിന്തറ്റിക് മയക്കുമരുന്ന് വേട്ടയാണിത്. ഇതിനുപിന്നാലെയാണ് കാരന്തൂരിൽ മറ്റൊരു യുവാവ് അറസ്റ്റിലായത്. രണ്ട് ഗ്രാം എംഡിഎംഎയും എൽഎസ്ഡിയുമാണ് ഇയാളിൽനിന്ന് പിടിച്ചത്.
തിങ്കൾ രാവിലെ മാങ്കാവ് ജങ്ഷനിൽ വ്യാപാരം നടത്തുന്ന യുവാക്കളിൽനിന്നാണ് രണ്ടുലക്ഷം രൂപ വിലമതിക്കുന്ന ലഹരിവസ്തുക്കൾ പിടിച്ചത്.
മയക്കുമരുന്ന് ഉപയോഗിക്കുന്ന ചെറുപ്പക്കാരാണ് വിൽപ്പനക്കാരായി മാറുന്നതെന്ന് എക്സൈസ് ഉദ്യോഗസ്ഥർ പറയുന്നു. ഈ സാഹചര്യത്തിൽ മയക്കുമരുന്ന് വേട്ട കൂടുതൽ ശക്തമാക്കുമെന്ന് എക്സൈസ് ഡെപ്യൂട്ടി കമീഷണർ കെ ജയപാലൻ പറഞ്ഞു. നഗരത്തിൽ സിന്തറ്റിക് ലഹരിമരുന്ന് വിൽപ്പന കൂടിയിട്ടുണ്ട്. ഇതിന് തടയിടാൻ പ്രത്യേക സ്ക്വാഡ് രൂപീകരിക്കുമെന്നും അദ്ദേഹം പറഞ്ഞു.
