ഭരണഘടന ഉറപ്പു നൽകുന്ന മൗലികാവകാശങ്ങളുടെ അനിഷേധ്യ ഭാഗമാണ് അഭിപ്രായ പ്രകടനത്തിനും ആവിഷ്കാരത്തിനുമുള്ള സ്വാതന്ത്ര്യമെന്ന് പറഞ്ഞുകൊണ്ടാണ് മുഖ്യമന്ത്രി വിഷയത്തിൽ പ്രതികരണം രേഖപ്പെടുത്തിയത്. അത് തടസ്സപ്പെടാത്ത സാഹര്യമാണുണ്ടാകേണ്ടതെന്നും അദ്ദേഹം കൂട്ടിച്ചേർത്തു.
Also Read :
“വൈവിധ്യമാര്‍ന്ന അഭിപ്രായപ്രകടനങ്ങള്‍ക്കു പൊതുമണ്ഡലത്തില്‍ ഇടമുണ്ടാകണം. മറിച്ചായാല്‍ ആത്യന്തികമായി ജനാധിപത്യം തന്നെ അപകടപ്പെടും. ആ വിപത്ത് ഉണ്ടാകില്ലെന്ന് ഉറപ്പുവരുത്താനുള്ള ജാഗ്രത സമൂഹത്തില്‍ പുലരേണ്ടതുണ്ട്. മീഡിയ വണ്ണിന്‍റെ പ്രവര്‍ത്തനം തടസ്സപ്പെടുത്തുന്നതിനിടയാക്കിയ കാരണങ്ങള്‍ എന്താണെന്ന് വ്യക്തമാക്കിയതായി കാണുന്നില്ല. ഗുരുതര വിഷയങ്ങൾ ഉണ്ടെങ്കിൽ അവ പ്രത്യേകമായി പരിശോധിക്കുകയും അതില്‍ ഭരണഘടനാനുസൃതമായ പ്രശ്‌നപരിഹാരം ഉണ്ടാക്കുകയുമാണ് വേണ്ടത്. അനുഛേദം 19ന്‍റെ ലംഘനമുണ്ടാകുന്നില്ല എന്ന് ഉറപ്പാക്കേണ്ടത് ജനാധിപത്യത്തിൽ വിശ്വസിക്കുന്ന എല്ലാവരുടെയും കടമയാണ്.” മുഖ്യമന്ത്രി ഫേസ്ബുക്കിൽ കുറിച്ചു.
അതേസമയം മീഡിയവൺ സംപ്രേഷണാവകാശം തടഞ്ഞ കേന്ദ്ര നടപടി നടപ്പാക്കുന്നത് രണ്ട് ദിവസത്തേക്ക് ഹൈക്കോടതി തടഞ്ഞിട്ടുണ്ട്. ജസ്റ്റിസ് എൻ. നഗരേഷിന്‍റേതാണ് ഇടക്കാല ഉത്തരവ്. ഹർജിയിൽ കേന്ദ്ര സർക്കാരിന്‍റെ വിശദീകരണം കോടതി തേടിയപ്പോൾ സുരക്ഷാ അനുമതി നിഷേധിച്ചത്തിന് മതിയായ കാരണമുണ്ടെന്നാണ് കേന്ദ്രം മറുപടി നൽകിയത്. ഹർജി ബുധനാഴ്ച വീണ്ടും പരിഗണിക്കും.
Also Read :
തിങ്കളാഴ്ച ഉച്ചയോടെയായിരുന്നു കേന്ദ്രം മീഡിയ വണ്ണിന്‍റെ സംപ്രേക്ഷണാവകാശം തടഞ്ഞത്. സുരക്ഷാകാരണങ്ങൾ ഉന്നയിച്ചായിരുന്നു നടപടി. എന്നാൽ ഇതുമായി ബന്ധപ്പെട്ട വിശദാംശങ്ങൾ തങ്ങൾക്ക് ലഭ്യമായിട്ടില്ലെന്നാണ് ചാനൽ പറയുന്നത്.
