“ഓരോരോ മാധ്യമ സ്ഥാപനങ്ങളെ വരുതിയിലാക്കാനാണ് കേന്ദ്രസർക്കാർ പരിശ്രമിച്ചുകൊണ്ടിരിക്കുന്നത്. ഇതിന്റെ ഭാഗമായി മീഡിയാ വണ്ണിന്റെ സംപ്രേക്ഷണം നിർത്തിവെക്കാൻ നൽകിയ നിർദ്ദേശം അപലപനീയവും, പ്രതിഷേധാർഹവുമാണ്.” സിപിഎം സംസ്ഥാന സെക്രട്ടറിയേറ്റ് പ്രസ്താവനയിൽ പറഞ്ഞു.
അതേസമയം മീഡിയ വൺ ചാനലിന് സംപ്രേക്ഷണ വിലക്കേർപ്പെടുത്തിയ കേന്ദ്രസർക്കാരിന്റെ ഉത്തരവ് ഹൈക്കോടതി രണ്ട് ദിവസത്തേക്ക് സ്റ്റേ ചെയ്തു. ജസ്റ്റിസ് എൻ നാഗരേഷിന്റേതാണ് ഉത്തരവ്. ചാനൽ നൽകിയ ഹർജിയിൽ ഹൈക്കോടതി കേന്ദ്രസർക്കാരിന്റെ വിശദീകരണം തേടി.
ചാനലിന്റെ സംപ്രേക്ഷണാവകാശം തടഞ്ഞത് രാജ്യസുരക്ഷാ കാരണങ്ങൾക്കൊണ്ടാണെന്നും കോടതി ഇടപെടൽ പാടില്ലെന്നുമാണ് കേന്ദ്രം വാദിച്ചത്. ചാനലിന് സംപ്രേക്ഷണ വിലക്ക് ഏർപ്പെടുത്താൻ മതിയായ കാരണം ഉണ്ടെന്നാണ് കേന്ദ്രത്തിന്റെ വാദം. തിങ്കളാഴ്ച ഉച്ചയോടെയാണ് കേന്ദ്രം മീഡിയ വണ്ണിന്റെ സംപ്രേക്ഷണാവകാശം തടഞ്ഞത്.
ചാനലിൻ്റെ ലൈസൻസ് പുതുക്കുന്നതിൻ്റെ ഭാഗമായുള്ള അപേക്ഷ നൽകിയിരുന്നു. ഇതുമായി ബന്ധപ്പെട്ട നടപടി ക്രമങ്ങൾ തുടരുന്നതിനിടെ ചാനലിൻ്റെ ലൈസൻസ് റദ്ദാക്കുകയായിരുന്നു. ലൈസൻസ് റദ്ദാക്കാതിരിക്കാൻ കാരണം ഉണ്ടെങ്കിൽ അതറിയിക്കണമെന്ന് ആവശ്യപ്പെട്ട് കേന്ദ്രം നോട്ടീസ് നൽകിയിരുന്നുവെന്നും ഇതിന് മറുപടി നൽകിയിരുന്നതാണെന്നും പ്രമോദ് രാമൻ പറഞ്ഞു. കേന്ദ്ര നടപടിക്കെതിരെ സുപ്രീംകോടതിയെ സമീപിക്കുമെന്ന് അദ്ദേഹം പറഞ്ഞു.
