ഓരോ പ്രദേശത്തെയും സാഹചര്യങ്ങൾ അനുസരിച്ചാകും പാർട്ടിയുടെ പ്രവർത്തനം. ബ്രാഞ്ച് അടിസ്ഥാനത്തിൽ വീടുകളിൽ സഹായമെത്തിക്കാനാണ് തീരുമാനമെന്ന് കോടിയേരി ബാലകൃഷ്ണൻ വ്യക്തമാക്കി. സംസ്ഥാനത്ത് കൊവിഡ് വ്യാപനം തീവ്രമാകുന്ന സാഹചര്യത്തിലാണ് സിപിഎം പ്രതിരോധ സഹായപ്രവർത്തനങ്ങളുമായി മുന്നോട്ട് പോകാൻ തീരുമാനിച്ചത്.
രോഗബാധിതരായവരുടെ വീടുകൾ സന്ദർശിച്ച് അവരുടെ ആവശ്യങ്ങൾ അറിയുകയും അവ പരിഹരിക്കുകയും വേണമെന്ന് കോടിയേരി പാർട്ടി പ്രവർത്തകർക്ക് നിർദേശം നൽകി. എൽഡിഎഫ് ഭരിക്കുന്ന തദ്ദേശസ്ഥാപനങ്ങൾ പൊതുജന പങ്കാളിത്തത്തോടെ ഈ പ്രവർത്തനങ്ങൾക്ക് മുൻകൈയെടുക്കണം. വാർഡ്തല സമിതികൾ പ്രവർത്തന സജ്ജമാക്കണം.
ആശുപത്രികളിൽ രോഗികൾ കുറവാണ്. വീടുകളിലാണ് ഭൂരിപക്ഷം പേരും. കിടപ്പുരോഗികളെയടക്കം സന്ദർശിച്ച് സഹായിക്കണം. ഇത് സംബന്ധിച്ച നിർദേശം ജില്ലാ കമ്മിറ്റികൾക്ക് നൽകിയിട്ടുണ്ടെന്നും കോടിയേരി പറഞ്ഞു.
അതേസമയം കൊവിഡ് വ്യാപനത്തിന്റെ അടിസ്ഥാനത്തിൽ ഏർപ്പെടുത്തിയ കടുത്ത നിയന്ത്രണങ്ങൾ കൂടുതൽ ജില്ലകളിലേക്ക് വ്യാപിപ്പിച്ചിരിക്കുകയാണ്. നാല് ജില്ലകളെയാണ് സി കാറ്റഗറിയിൽ ഉൾപ്പെടുത്തിയത്. കൊല്ലം, പത്തനംതിട്ട, കോട്ടയം, ഇടുക്കി ജില്ലകളെയാണ് സി കാറ്റഗറിയില് പുതുതായി ഉള്പ്പെടുത്തിയിരിക്കുന്നത്. മുഖ്യമന്ത്രിയുടെ അധ്യക്ഷതയില് ചേര്ന്ന കൊവിഡ് അവലോകന യോഗത്തിലാണ് തീരുമാനം.
തിരുവനന്തപുരം ജില്ല നേരത്തെ തന്നെ സി കാറ്റഗറിയിലാണ്. ആശുപത്രിയിൽ പ്രവേശിപ്പിക്കപ്പെടുന്ന രോഗികളിൽ 25 ശതമാനത്തിൽ കൂടുതൽ കൊവിഡ് രോഗികളാകുമ്പോഴാണ് ഒരു ജില്ലയെ സി കാറ്റഗറിയിൽ ഉൾപ്പെടുത്തി നിയന്ത്രണങ്ങൾ കടുപ്പിക്കുക. ഈ ജില്ലയിൽ സാമൂഹ്യ-രാഷ്ട്രീയ-സാംസ്കാരിക-മത-സാമുദായികപരമായ പൊതുപരിപാടികൾ ഉൾപ്പെടെ ഒരു ഒത്തുചേരലുകളും പാടില്ല.
