രോഗവ്യാപനം തടയാനായി കര്‍ശന ജാഗ്രത വേണമെന്ന് മുഖ്യമന്ത്രി പിണറായി വിജയൻ നിര്‍ദേശിച്ചു. ചികിത്സാ ആവശ്യത്തിനായി യുഎസിൽ തുടരുന്ന മുഖ്യമന്ത്രി വീഡിയോ കോൺഫറൻസിങ് വഴിയാണ് യോഗത്തിൽ പങ്കെടുത്തത്. നാളത്തെ കൊവിഡ് 19 അവലോകന യോഗത്തിനു ശേഷമായിരിക്കും നിയന്ത്രണങ്ങൾ പ്രഖ്യാപിക്കുക.
Also Read:
അതേസമയം, രണ്ടാം തരംഗത്തെ അപേക്ഷിച്ച് കേസുകളുടെ എണ്ണം കൂടുതലാണെങ്കിലും ആശുപത്രിയിൽ പ്രവേശിപ്പിക്കപ്പെടുന്ന രോഗികളുടെ എണ്ണം കുറവാണെന്നാണ് സര്ക്കാര് വിലയിരുത്തുന്നത്. ആശുപത്രികളിൽ ഐസിയു, വെന്‍റിലേറ്റര്‍, ഓക്സിജൻ സൗകര്യങ്ങള്‍ പര്യാപ്തമാണെന്നും സര്ക്കാര് വ്യക്തമാക്കിയിട്ടുണ്ട്.
യുഎസിലെ മയോക്ലിനിക്കിൽ ചികിത്സയ്ക്കായി കഴിഞ്ഞയാഴ്ചയാണ് മുഖ്യമന്ത്രി തിരിച്ചത്. വിദേശത്താണെങ്കിലും മന്ത്രിസഭാ യോഗങ്ങളിൽ അടക്കം മുഖ്യമന്ത്രി പങ്കെടുക്കുമെന്ന് സംസ്ഥാന സര്ക്കാര് അറിയിച്ചിരുന്നു.
Also Read:
നിലവിൽ സംസ്ഥാനത്ത് പല ജില്ലകളിലും 35 ശതമാനത്തിലേറെയാണ് ടെസ്റ്റ് പോസിറ്റിവിറ്റി നിരക്ക്. പലയിടത്തും ക്ലസ്റ്ററുകള്‍ അടക്കം രൂപപ്പെട്ട സാഹചര്യത്തിൽ കേരളത്തിൽ കോളേജുകള്‍ അടയ്ക്കാനും ക്ലാസുകള്‍ ഓൺലൈനാക്കാനും ആലോചിക്കുന്നതായി ഉന്നത വിദ്യാഭ്യാസമന്ത്രി ആര്‍ ബിന്ദു അറിയിച്ചിരുന്നു. നിലവിൽ ഒൻപതാം ക്ലാസിനു താഴേയ്ക്കുള്ള കുട്ടികൾ സ്കൂളിലെത്തുന്നത് സര്ക്കാര് വിലക്കിയിട്ടുണ്ട്. നാളത്തെ യോഗത്തിനു ശേഷം കൂടുതൽ നിയന്ത്രണങ്ങള്‍ സര്ക്കാര് പ്രഖ്യാപിച്ചേക്കും.
പുതുവത്സരത്തോടു അനുബന്ധിച്ച് സംസ്ഥാനത്ത് രാത്രി കര്‍ഫ്യൂ അടക്കം സര്ക്കാര് പ്രഖ്യാപിച്ചിരുന്നെങ്കിലും രണ്ട് ദിവസത്തേയ്ക്ക് മാത്രമായിരുന്നു നിയന്ത്രണങ്ങള്‍. ആള്‍ക്കൂട്ടങ്ങള്‍ ഒഴിവാക്കാനായി പരിപാടികളിൽ പങ്കെടുക്കാവുന്നവരുടെ എണ്ണത്തിൽ നിയന്ത്രണമുണ്ടെങ്കിലും നടപടികള്‍ കര്‍ശനമല്ല. സിപിഎം ജില്ലാ സമ്മേളനങ്ങള്‍ അടക്കം പലയിടത്തും പൊതുപരിപാടികള്‍ നടക്കുന്നുമുണ്ട്. എന്നാൽ രോഗവ്യാപനം വര്‍ധിക്കുന്ന പശ്ചാത്തലത്തിൽ നിയന്ത്രണങ്ങൾ ഏര്‍പ്പെടുത്തണം എന്നതാണ് സംസ്ഥാന സര്ക്കാര് നിലപാട്.
വിദ്യാഭ്യാസ സ്ഥാപനങ്ങളിൽ ക്ലസ്റ്ററുകള്‍ രൂപപ്പെട്ടാൽ സ്ഥാപനങ്ങള്‍ 15 ദിവസത്തേയ്ക്ക് അടച്ചിടാൻ പ്രിൻസിപ്പാള്‍മാര്‍ക്ക് നിര്‍ദേശം നല്‍കിയതായാണ് ഉന്നതവിദ്യാഭ്യാസ വകുപ്പ് മന്ത്രി അറിയിച്ചത്.
