തിരുവനന്തപുരം ജില്ലയിൽ മാത്രം മുപ്പതിലേറെ ആക്ടീവ് ക്ലസ്റ്ററുകളാണ് ഉള്ളത്. 22 ക്ലസ്റ്ററുകളാണ് എറണാകുളം ജില്ലയിലുള്ളത്. പത്ത് ദിവസത്തിനുള്ളിൽ ആശുപത്രിയിൽ പ്രവേശിപ്പിക്കപ്പെട്ട രോഗികൾ 41 ശതമാനവും ഓക്സിജൻ ആവശ്യമുള്ള രോഗികൾ 30 ശതമാനവും വർധിച്ചു. ഐസിയു രോഗികൾ 21 ശതമാനം വർദ്ധിച്ചിട്ടുണ്ട്.
തിരുവനന്തപുരം മെഡിക്കൽ കോളേജ്, തിരുവനന്തപുരം ജനറൽ ആശുപത്രി, കളമശേരി മെഡിക്കൽ കോളേജ്, കോഴിക്കോട് മെഡിക്കൽ കോളേജ് എന്നിവിടങ്ങളിലെ ആരോഗ്യ പ്രവർത്തകർക്കിടയിൽ കൊവിഡ് വ്യാപനം രൂക്ഷമാണ്.
തിരുവനന്തപുരം മെഡിക്കൽ കോളേജിലെ 25 ഡോക്ടർമാർ ഉൾപ്പെടെ 107 പേർക്ക് കൊവിഡ് സ്ഥിരീകരിച്ചു. തിരുവനന്തപുരം ജനറൽ ആശുപത്രിയിലെ 10 ഡോക്ടർമാർക്കും 17 ആരോഗ്യ പ്രവർത്തകർക്കും കൊവിഡ് ബാധിച്ചു. നേമം താലൂക്ക് ആശുപത്രിയിൽ മൂന്ന് ഡോക്ടർമാർ അടക്കം 21 പേർക്കാണ് രോഗബാധ റിപ്പോർട്ട് ചെയ്യപ്പെട്ടിരിക്കുന്നത്.
കളമശേരി മെഡിക്കൽ കോളേജിൽ 22 ഡോകർമാർ ഉൾപ്പെടെ 75 ജീവനക്കാർക്കാണ് കൊവിഡ് ബാധിച്ചിരിക്കുന്നത്. ഡോക്ടർമാരിൽ 17 പേർ ഹൗസ് സ‍ര്‍ജൻമാരാണ്. 11 നഴ്സുമാ‍ര്‍, 29 മെഡിക്കൽ വിദ്യാ‍ര്‍ത്ഥികൾ, 13 ജീവനക്കാ‍ര്‍ എന്നിവരാണ് മറ്റുള്ളവ‍ര്‍.
കോഴിക്കോട് മെഡിക്കൽ കോളേജിൽ ഏഴ് ഡോക്ട‍ര്‍മാർക്കും നാല് മെഡിക്കൽ വിദ്യാ‍ര്‍ത്ഥികൾക്കുമാണ് കൊവിഡ് സ്ഥിരീകരിച്ചിരിക്കുന്നത്.
അതേസമയം സംസ്ഥാനത്ത് കൊവിഡ് വ്യാപനം രൂക്ഷമായ സാഹചര്യത്തിൽ കൂടുതൽ നിയന്ത്രണങ്ങൾക്ക് സാധ്യത ഏറിയിരിക്കുകയാണ്. വ്യാഴാഴ്ച മുഖ്യമന്ത്രി പിണറായി വിജയന്റെ നേതൃത്വത്തിൽ കൊവിഡ് അവലോകന യോഗം ചേരും. മുഖ്യമന്ത്രിയെ കൂടാതെ ആരോഗ്യ വകുപ്പ് മന്ത്രി, തദ്ദേശ സ്വയംഭരണ വകുപ്പ് മന്ത്രി, വകുപ്പു സെക്രട്ടറിമാർ അടക്കമുള്ളവർ യോഗത്തിൽ പങ്കെടുക്കും.
