ആലപ്പുഴ > ഒബിസി മോർച്ച സംസ്ഥാന സെക്രട്ടറി അഡ്വ. രഞ്ജിത്ത് ശ്രീനിവാസനെ വെട്ടിക്കൊന്ന കേസിൽ ഒരാൾ കൂടി പിടിയിൽ. സൂത്രധാരന്മാരിൽ ഒരാളായ എസ്ഡിപിഐ ആലപ്പുഴ നഗരസഭാ ഏരിയാ പ്രസിഡന്റ് നൂറുദ്ദീൻ പുരയിടത്തിൽ ഷെർനാസിനെയാണ് (39) പ്രത്യേക അന്വേഷണ സംഘം പിടികൂടിയത്. പ്രതിയെ ചൊവ്വാഴ്ച കോടതിയിൽ ഹാജരാക്കും. ഇതോടെ കേസിൽ പിടിയിലാവരുടെ എണ്ണം 19 ആയി.
കുറ്റകൃത്യത്തിൽ നേരിട്ട് പങ്കാളികളായ പ്രതികൾ ഒളിപ്പിച്ച ആയുധം കഴിഞ്ഞദിവസം പൊലീസ് കണ്ടെത്തിയിരുന്നു. ആലപ്പുഴ ഇരവുകാട് ഭാഗത്തെ പറമ്പിൽനിന്നും സമീപത്തെ തോട്ടിൽനിന്നുമാണ് രണ്ടു വടിവാളുകൾ കണ്ടെത്തിയത്. കേസിനെ പ്രതികൂലമായി ബാധിക്കുമെന്നതിനാൽ നേരത്തെ അറസ്റ്റിലായ മുഖ്യസൂത്രധാരനടക്കമുള്ള ആറു പ്രതികളുടെ പേരുവിവരങ്ങൾ പൊലീസ് പുറത്തുവിട്ടിട്ടില്ല.
