മന്ത്രിമാരുടെ ഓഫീസുകൾക്ക് വേഗത പോരെന്ന വിമർശനമാണ് പാളയം ഏരിയാ കമ്മിറ്റിക്കുവേണ്ടി വി കെ പ്രശാന്ത് എംഎൽഎ ഉന്നയിച്ചത്. ഒന്നാം പിണറായി സർക്കാർ കൊള്ളാം. രണ്ടാം പിണറായി സർക്കാർ പോര തുടങ്ങിയ വിമർശനങ്ങളാണ് തിരുവനന്തപുരം ജില്ലാ സമ്മേളനത്തിൽ ഉയർന്നത്. മുഖ്യമന്ത്രി പിണറായി വിജയൻ നിയന്ത്രിക്കുന്ന ആഭ്യന്തര വകുപ്പിനെതിരെയും വിമർശനം ഉയർന്നു.
ആരുടേയും ക്വട്ടേഷൻ പിടിച്ചിട്ടല്ല മന്ത്രിമാരുടെ ഓഫീസിൽ പോകുന്നത്. ജനങ്ങളുടെ ആവശ്യത്തിനാണ് ചെല്ലുന്നത്. എന്നാൽ ആരുടെയോ ക്വട്ടേഷനുമായി ചെന്നിരിക്കുന്നു എന്ന മട്ടിലാണ് മുഖ്യമന്ത്രിയുടെ ഓഫീസിലിരിക്കുന്ന ഉദ്യോഗസ്ഥർ പെരുമാറുന്നത്. മുഖ്യമന്ത്രിയുടെ ഓഫീസിൽ കാര്യങ്ങൾ നോക്കാൻ ആരുമില്ലെന്ന അവസ്ഥയാണെന്നും പൊതു ചർച്ചയിൽ വിമർശനം ഉയർന്നു.
തെരഞ്ഞെടുപ്പിൽ വനിതകളെ സ്ഥാനാർത്ഥികളാക്കാൻ പാർട്ടി ഇപ്പോഴും വിമുഖത കാണിക്കുകയാണ്. വനിതാ സംവരണത്തിനു വേണ്ടി വാദിക്കുമ്പോഴും വനിതകളെ തഴയുന്ന സമീപനമാണ് പാർട്ടി നേതൃത്വം സ്വീകരിക്കുന്നത്. ആരോഗ്യ, വ്യവസായ വകുപ്പ് മന്ത്രിമാർക്കെതിരെയും വിമർശനം ഉയർന്നു. ആരോഗ്യ വകുപ്പ് മന്ത്രിയുടെ ഓഫീസിൽ പാവങ്ങൾക്ക് കയറാൻ കഴിയുന്നില്ലെന്ന് കിളിമാനൂർ ഏരിയ കമ്മിറ്റി പരാതിപ്പെട്ടു.
ദൈനംദിന പ്രവർത്തനത്തിൽ പാർട്ടി ഇടപെടേണ്ടെന്ന മുഖ്യമന്ത്രി പിണറായി വിജയന്റെ പ്രസ്താവനയ്ക്കെതിരെയും ജില്ലാ സമ്മേളനം വിമർശനം ഉന്നയിച്ചു. പാർട്ടി-സർക്കാർ ബന്ധത്തെക്കുറിച്ചുള്ള നയരേഖയുടെ അടിസ്ഥാനത്തിലാണ് മുഖ്യമന്ത്രി ഇക്കാര്യം പറഞ്ഞത്. ഭരണം നടത്താൻ ചില സഖാക്കളെ ഏൽപ്പിച്ചിട്ടുണ്ടെന്നും അക്കാര്യം അവർ നോക്കിയാൽ മതിയെന്നുമാണ് മുഖ്യമന്ത്രിയുടെ പ്രസ്താവന.
