ഫ്രാങ്കോ മുളയ്ക്കൽ കേസിലെ വിധി; ജലന്ധർ രൂപതയുടെ പ്രതികരണം ഇങ്ങനെ

കോട്ടയം: കന്യാസ്ത്രീയെ ബലാത്സംഗം ചെയ്ത കേസിൽ ബിഷപ്പ് കുറ്റവിമുക്തനാക്കപ്പെട്ട സംഭവത്തിൽ പ്രതികരിച്ച് ജലന്ധർ രൂപത. ബിഷപ്പ് ഫ്രാങ്കോയുടെ നിരപരാധിത്വത്തിൽ നാളിതുവരെ വിശ്വസിച്ചവർക്കും അദ്ദേഹത്തിന് വേണ്ട നിയമസഹായം ചെയ്തവർക്കും നന്ദി അറിയിക്കുന്നതായി രൂപത വ്യക്തമാക്കി.

കോടതി വിധിവന്ന് മിനിറ്റുകൾക്കകമാണ് ജലന്ധർ രൂപതയുടെ ഭാഗത്ത് നിന്നും പ്രതികരണം ഉണ്ടായത്. രൂപത ആസ്ഥാനത്ത് ഒരു വിഭാഗം വൈദികരും ആളുകളും സന്തോഷം പ്രകടിപ്പിച്ച് ഒത്തുകൂടി. കേസിൽ വിധി പറഞ്ഞ കോട്ടയം അഡീഷണൽ സെഷൻസ് കോടതിക്ക് പുറത്ത് ലഡു വിതരണമടക്കമുള്ള ആഘോഷങ്ങൾ നടന്നു. ബിഷപ്പിൻ്റെ ബന്ധുക്കളും അനുയായികളുമടക്കം നിരവധിയാളുകൾ കോടതിയിൽ എത്തിയിരുന്നു.

കേസിൽ കുറ്റവിമുക്തനാക്കപ്പെട്ട വിധി കേട്ട് ബിഷപ്പ് ഫ്രാങ്കോ മുളയ്ക്കൽ കോടതി മുറിക്ക് പുറത്ത് പൊട്ടിക്കരഞ്ഞു. ‘ദൈവത്തിന് സ്തുതി’ എന്ന് മാത്രമായിരുന്നു ബിഷപ്പിൻ്റെ പ്രതികരണം. കേസില്‍ നിന്ന് കുറ്റവിമുക്തനാക്കിയെന്ന് ഒറ്റവരിയിലായിരുന്നു കോടതി വിധി.

കന്യാസ്ത്രീയെ ബലാത്സംഗം ചെയ്ത കേസിൽ ബിഷപ്പ് ഫ്രാങ്കോ മുളയ്ക്കൽ കുറ്റക്കാരനല്ലെന്നാണ് കോട്ടയം അഡീഷണൽ സെഷൻസ് കോടതി ജഡ്ജി ജി ഗോപകുമാറാണ് വിധി പറഞ്ഞത്. ബിഷപ്പ് കുറ്റം ചെയ്തെന്ന് തെളിയിക്കാൻ പ്രോസിക്യൂഷൻ പരാജയപ്പെട്ടെന്ന് കോടതി വിധി പ്രസ്താവനത്തിൽ ജഡ്ജി ജി ഗോപകുമാർ വ്യക്തമാക്കുകയും ചെയ്തു.

കോടതി വിധി ഒരു കാരണവശാലും അംഗീകരിക്കാൻ കഴിയില്ലെന്ന് കേസ് അന്വേഷണത്തിന് മേൽനോട്ടം വഹിച്ച കോട്ടയം മുൻ ജില്ലാ പോലീസ് മേധാവി എസ് ഹരിശങ്കർ പറഞ്ഞു. ഇന്ത്യയിൽ തന്നെ വേറിട്ട നിൽക്കുന്ന വളരെ അസാധാരണമായ കോടതി വിധിയാണിത്. അതിനാൽ തന്നെ വിധിക്കെതിരെ അപ്പീൽ നൽകും. പീഡനക്കേസിൽ ഇരയുടെ മാനസികാവസ്ഥയും മൊഴിയും ഉൾക്കൊണ്ട് മേൽക്കോടതികളുടെ വിധികളുണ്ടായിട്ടുള്ളതെന്നും അദ്ദേഹം പറഞ്ഞു. പ്രതിഭാഗം ഹാജരാക്കി സാക്ഷികളാരും ഒരു വസ്തുതയും വിശ്വസനീയമായി പറയാൻ കഴിയുന്നവരല്ല. പ്രോസിക്യൂഷൻ്റെ സാക്ഷികൾ വളരെ കൃത്യമായി മൊഴി നൽകുകയും ചെയ്തു. എന്ത് വ്യാഖ്യാനമാണ് കോടതി നടത്തിയതെന്നറിയാൻ വിധിപ്പകർപ്പ് ലഭിക്കേണ്ടതുണ്ട്. സാക്ഷികളായ കന്യാസ്ത്രീകൽക്ക് സുരക്ഷ നൽകുമെന്നും ഹരിശങ്കർ പറഞ്ഞു.

105 ദിവസത്തെ വിസ്താരത്തിന് ശേഷമാണ് കേസിൽ വിധി വന്നത്. കുറവിലങ്ങാട്ടെ മിഷണറീസ് ഓഫ് ജീസസ് മഠത്തിൽവെച്ച് 2014 മുതൽ 2016വരെയുള്ള കാലയളവിൽ കുറവിലങ്ങാട് മഠത്തിൽ വെച്ച് കന്യാസ്ത്രീയെ ബിഷപ്പ് ഫ്രാങ്കോ 13 തവണ ലൈംഗികമായി പീഡിപ്പിച്ചുവെന്നാണ് കേസ്. ബലാത്സംഗം, അന്യായമായി തടവിൽ വെക്കൽ, അധികാരം ഉപയോഗിച്ച് സ്ത്രീയെ ലൈംഗികമായി പീഡിപ്പിക്കൽ ഉൾപ്പെടെയുള്ള ആറ് വകുപ്പുകളാണ് ബിഷപ്പിനെതിരെ ചുമത്തിയിരുന്നത്.

ഒരു വർഷം മുൻപാണ് കേസിൽ കുറ്റപത്രം സമർപ്പിച്ചത്. 83 സാക്ഷികളിൽ 39 പേരെ വിചാരണയ്ക്കിടെ വിസ്തരിക്കുകയും ചെയ്തു.
സിറോ മലബാർ സഭ മേജർ ആർച്ച് ബിഷപ്പ് കർദിനാൾ ജോർജ് ആലഞ്ചേരി, മൂന്ന് ബിഷപ്പുമാർ, 11 വൈദികർ, 24 കന്യാസ്ത്രീകൾ എന്നിവരടക്കം 83 സാക്ഷികളാണ് കേസിലുണ്ടയിരുന്നത്.