ദിലീപിനെതിരായ കേസുകളിലെ അന്വേഷണം വേഗത്തിൽ പൂർത്തിയാക്കും. അന്വേഷണ വിധേയമായിട്ടുള്ള കാര്യങ്ങളെക്കുറിച്ച് പറയാൻ നിർവാഹമില്ല. ദിലീപിൻ്റെ വീട്ടിൽ പരിശോധന നടന്നിട്ടുണ്ട്. പുതിയതായി എടുത്തിട്ടുള്ള കേസിൻ്റെയും മുൻപ് ഉണ്ടായിരുന്ന കേസിൻ്റെയും പുനരന്വേഷണത്തിൻ്റെയും ഭാഗമായിട്ടാണ് പരിശോധന നടത്തിയത്. പരിശോധനയിൽ ലഭിക്കുന്ന തെളിവുകളനുസരിച്ച് അന്വേഷണം മുന്നോട്ട് പോകും. അന്വേഷണം ചുരുങ്ങിയ സമയത്തിനുള്ളിൽ പൂർത്തിയാക്കുമെന്നും എഡിജിപി എസ് ശ്രീജിത്ത് പറഞ്ഞു.
ദിലീപിൻ്റെ വീട്ടിലും മറ്റിടങ്ങളിലും നടക്കുന്നതെ പരിശോധന മാത്രമാണെന്ന് ക്രൈംബ്രാഞ്ച് എസ്പി മോഹനചന്ദ്രൻ പറഞ്ഞു. നടനെ ചോദ്യം ചെയ്യുന്നതടക്കമുള്ള നടപടികൾ ഇന്നുണ്ടാകില്ലെന്നും അദ്ദേഹം കൂട്ടിച്ചേർത്തു. ക്രൈംബ്രാഞ്ച് എസ്പിയുടെ നേതൃത്വത്തിൽ ആലുവ പറവൂർക്കവലയിലെ പത്മസരോവരം എന്ന ദിലീപിൻ്റെ വീട്, സഹോദരൻ അനൂപിൻ്റെ വീട്, ദിലീപിൻ്റെയും അനൂപിൻ്റെയും സിനിമാ നിർമ്മാണക്മ്പനിയായ ഗ്രാൻഡ് പ്രൊഡക്ഷൻസിൻ്റെ കൊച്ചി ചിറ്റൂർ റോഡിലുള്ള ഓഫീസ് എന്നിവടങ്ങളിലാണ് ഒരേസമയം റെയ്ഡ് നടന്നത്.
എട്ട് മണിക്കൂറോളം നീണ്ട് നിന്ന റെയ്ഡിനിടെ ദിലീപിൻ്റെ വീട്ടിൽ നിന്നും കമ്പ്യൂട്ടർ ഹാർഡ് ഡിസ്ക്, മൊബൈൽ ഫോൺ തുടങ്ങിയവ കണ്ടെത്തിയെന്ന സൂചന ലഭിച്ചതായി മാതൃഭൂമി റിപ്പോർട്ട് ചെയ്തു. ആവശ്യമെങ്കിൽ വരും ദിവസങ്ങളിൽ വീണ്ടും പരിശോധന നടത്താനാണ് ക്രൈംബ്രാഞ്ചിൻ്റെ തീരുമാനം. നടിയെ ആക്രമിച്ച കേസിലെ ദൃശ്യങ്ങൾ ദിലീപിൻ്റെ പക്കലുണ്ടെന്ന വെളിപ്പെടുത്തലിൻ്റെയും അന്വേഷണ ഉദ്യോഗസ്ഥരെ അപായപ്പെടുത്താൻ ശ്രമിച്ചെന്ന കേസിൻ്റെയും അടിസ്ഥാനത്തിലായിരുന്നു പരിശോധന.
അന്വേഷണ ഉദ്യോഗസ്ഥരെ അപായപ്പെടുത്താൻ ശ്രമിച്ചുവെന്ന ബാലചന്ദ്രകുമാറിന്‍റെ വെളിപ്പെടുത്തലിൽ ദിലീപിന്‍റെ കയ്യിൽ ഒരു തോക്ക് ഉണ്ടായിരുന്നുവെന്ന് വ്യക്തമാക്കിയിരുന്നു. ആ തോക്ക് എവിടെ എന്നാണ് ക്രൈംബ്രാഞ്ച് സംഘം പ്രത്യേകമായും അന്വേഷിക്കുന്നത്. തോക്ക് ലൈസൻസ് ദിലീപിന് ഉണ്ടായിരുന്നില്ലെന്ന് കണ്ടെത്തിയിട്ടുണ്ട്. അങ്ങനെയെങ്കിൽ ആ തോക്ക് ആരാണ് കൊണ്ടുവന്നതെന്നും അന്വേഷണ സംഘം പരിശോധിക്കുന്നുണ്ട്. മാത്രമല്ല ബാലചന്ദ്രകുമാർ വെളിപ്പെടുത്തിയ വിഐപി ആരെന്നും അന്വേഷണ സംഘത്തിന് കണ്ടെത്തേണ്ടതുണ്ട്.
