ബലാത്സംഗം ഉൾപ്പെടെ ആറ് വകുപ്പുകൾ; ഫ്രാങ്കോ മുളയ്ക്കൽ കേസിൽ വിധി നാളെ

കോട്ടയം: കന്യാസ്ത്രീയെ ബലാത്സംഗം ചെയ്തെന്ന കേസിൽ കോടതി നാളെ വിധി പറയും. കോട്ടയം അഡീഷണൽ സെഷൻസ് കോടതിയാണ് വിധി പ്രസ്താവം നടത്തുക. ബിഷപ്പ് ഫ്രാങ്കോ മുളയ്ക്കൽ കുറവിലങ്ങാട് മഠത്തിൽ വെച്ച് കന്യാസ്ത്രീയെ ബലാത്സംഗം ചെയ്തെന്നാണ് കേസ്. ബലാത്സംഗം ഉൾപ്പെടെ ആറ് വകുപ്പുകളാണ് ഫ്രാങ്കോ മുളയ്ക്കലിനെതിരെ ചുമത്തിയിട്ടുള്ളത്.

13 പ്രാവശ്യം ഫ്രാങ്കോ മുളയ്ക്കൽ പീഡിപ്പിച്ചുവെന്നാണ് 2018 ജൂണിൽ നൽകിയ പരാതിയിൽ പറഞ്ഞത്. മിഷനറീസ് ഓഫ് ജീസസിന്‍റെ കുറവിലങ്ങാട്ടെ മഠത്തിൽ 2014 മുതൽ 2016 വരെയുള്ള കാലയളവിലാണ് ജലന്തർ രൂപതാ ബിഷപ്പ് ഫ്രാങ്കോ മുളയ്ക്കൽ പീഡിപ്പിച്ചതെന്നും പരാതിയിൽ വ്യക്തമാക്കിയിരുന്നു. പരാതിയെത്തുടർന്ന് അന്വേഷണസംഘം വിവിധ സംസ്ഥാനങ്ങളിലായി നാല് മാസത്തോളം നടത്തിയ അന്വേഷണത്തിനൊടുവിലായിരുന്നു ഫ്രാങ്കോയുടെ അറസ്റ്റ് രേഖപ്പെടുത്തിയത്.

കേസെടുത്തിട്ടും ബിഷപ്പിനെ അറസ്റ്റ് ചെയ്യാൻ പോലീസ് തയ്യാറായില്ലെന്ന് ആരോപിച്ച് കന്യാസ്ത്രീകൾ ഹൈക്കോടതി ജംഗ്ഷനിൽ സമരം ആരംഭിച്ചതോടെ കേസ് വിവാദമാവുകയും ചെയ്തിരുന്നു. അറസ്റ്റിലായ ഫ്രാങ്കോ ബിഷപ്പ് ഹൈക്കടോതി ജാമ്യം അനുവദിച്ചതോടെയാണ് പുറത്തിറങ്ങിയത്. പിന്നീട് കേസിൽ നിന്ന് ഒഴിവാക്കണമെന്ന് ആവശ്യപ്പെട്ട് സുപ്രീം കോടതിയെ സമീപിച്ചെങ്കിലും ഇത് അംഗീകരിച്ചില്ല. ഇതിന് പിന്നാലെ 2019 ഏപ്രിലിലാണ് കുറ്റപത്രം സമർപ്പിക്കുന്നത്.

കഴിഞ്ഞയാഴ്ചയോടെ വിചാരണ പൂർത്തിയാക്കിയാണ് കോടതി വിധി പറയാൻ മാറ്റിവെച്ചത്. സിറോ മലബാർ സഭ മേജർ ആർച്ച് ബിഷപ്പ് കർദിനാൾ ജോർജ് ആലഞ്ചേരി, മൂന്ന് ബിഷപ്പുമാർ, 11 വൈദികർ, 24 കന്യാസ്ത്രീകൾ എന്നിവരുൾപ്പെടെ 83 സാക്ഷികളാണ് കേസിലുള്ളത്. ബലാത്സംഗം, പ്രകൃതിവിരുദ്ധ പീഡനം തുടങ്ങിയ കുറ്റങ്ങൾ ചുമത്തിയാണ് ബിഷപ്പിനെതിരെ കേസെടുത്തത്. കേസിൽ 39 പേരെയാണ് വിസ്തരിച്ചത്.

Also Read :
2020 സെപ്റ്റംബറിൽ വിചാരണ തുടങ്ങുകയും ചെയ്തു. ബലാത്സംഗം, അന്യായമായി തടവിൽ വെക്കൽ, അധികാരം ഉപയോഗിച്ച് സ്ത്രീയെ ലൈംഗികമായി പീഡിപ്പിക്കൽ ഉൾപ്പെടെയുള്ള ആറ് വകുപ്പുകളാണ് ബിഷപ്പിനെതിരെ ചുമത്തിയിരിക്കുന്നത്. ഒരു വർഷം മുൻപാണ് കേസിൽ കുറ്റപത്രം സമർപ്പിച്ചത്. 83 സാക്ഷികളിൽ 39 പേരെ വിചാരണയ്ക്കിടെ വിസ്തരിച്ചു. കേസുമായി ബന്ധപ്പെട്ട് ഫ്രാങ്കോ മുളയ്ക്കലിൻ്റെ മൊബൈൽ ഫോണും ലാപ് ടോപ്പും അടക്കം കോടതിയിൽ നിർണായക തെളിവുകളായ അന്വേഷണ സംഘം ഹാജരാക്കിയിരുന്നു.