ഡോ കെ ശിവൻ വിരമിക്കുന്ന പശ്ചാത്തലത്തിലാണ് സോമനാഥ് സ്ഥാനം ഏറ്റെടുക്കുന്നത്. എം ജി കെ മേനോൻ, കെ കസ്തൂരിരംഗൻ, മാധവൻ നായർ, കെ രാധാകൃഷ്ണൻ എന്നിവരാണ് നേരത്തെ ഈ സ്ഥാനത്തെത്തിയ മലയാളികൾ. റോക്കറ്റ് സാങ്കേതികവിദ്യയിലും റോക്കറ്റ് രൂപകൽപനയിലും ഇന്ധനം വികസിപ്പിക്കുന്നതിലും അദ്ദേഹം മികവ് പുലർത്തിയിട്ടുണ്ട്.
ഐഎസ്ആർഒയുടെ പുതിയ ചെയർമാനായി ഡോ എസ് സോമനാഥ് നിയമിക്കപ്പട്ടതോടെ ഇന്ത്യയുടെ ദേശീയ ബഹിരാകാശ ഗവേഷണ സ്ഥാപനത്തിൻ്റെ തലപ്പത്ത് വീണ്ടുമൊരു മലയാളി കൂടി അവരോധിതനായിരിക്കുകയാണ്. കേരളത്തെ സംബന്ധിച്ചിടത്തോളം അഭിമാനകരമായ നിമിഷമാണിതെന്ന് മുഖ്യമന്ത്രി പിണറായി വിജയൻ ഫേസ്ബുക്ക് പോസ്റ്റിൽ പറഞ്ഞു.
നിലവിൽ തിരുവനന്തപുരത്തെ വിക്രം സാരാഭായ് സ്പേസ് സെന്ററിന്റെ ഡയറക്ടറായ സോമനാഥ് ഐഎസ്ആർഒയുടെ കീഴിലുള്ള നിരവധി സുപ്രധാന ഗവേഷണ സംരംഭങ്ങൾക്ക് നേതൃത്വം നൽകിയിട്ടുണ്ട്. ഇന്ത്യൻ ബഹിരാകാശ ഗവേഷണങ്ങളെ കൂടുതൽ ഉയരങ്ങളിലേക്ക്
നയിക്കാനും നാടിൻ്റെ വളർച്ചയ്ക്കും ജനതയുടെ പുരോഗതിക്കും ഉതകുന്ന നേട്ടങ്ങൾ സംഭാവന ചെയ്യാനും അദ്ദേഹത്തിന് സാധിക്കട്ടെ എന്ന് ആശംസിക്കുന്നു എന്ന് മുഖ്യമന്ത്രി പറഞ്ഞു.
