കഴിഞ്ഞ നിയമസഭ തെരഞ്ഞെടുപ്പിൽ ഇടതുപക്ഷം മികച്ച ജയം നേടിയപ്പോൾ നാല് സിറ്റിങ് സീറ്റുകളായിരുന്നു ലീഗിന് നഷ്ടപ്പെട്ടത്. കോഴിക്കോട് സൗത്ത് , കുറ്റ്യാടി, കളമശേരി, അഴീക്കോട് എന്നിവ. ഇതിന് പുറമെ വിജയപ്രതീക്ഷ ഉണ്ടായിരുന്ന താനൂരും കൈവിട്ടു. മണ്ഡലം മാറി കൊടുവള്ളിയിൽ മത്സരിച്ച എംകെ മുനീർ ജയിച്ചെങ്കിലും പ്രതീക്ഷിച്ച വോട്ടും കിട്ടിയില്ല.
Also Read :
തെരഞ്ഞെടുപ്പിന് പിന്നാലെ അച്ചടക്ക സമിതി വീഴ്ച കണ്ടെത്തിയ കോഴിക്കോട് സൗത്ത്, കുറ്റ്യാടി മണ്ഡലങ്ങളിലെ ഭാരവാഹികൾക്കെതിരെയാണ് നടപടിയ്ക്ക് സാധ്യത. കോഴിക്കോട് സൗത്തിൽ സ്ഥാനാർഥിക്കെതിരെ മണ്ഡലം കമ്മിറ്റി പരസ്യമായി രംഗത്തെത്തിയത് നേരത്തെ തന്നെ ചർച്ചയായിരുന്നു. ഇത് നേതൃത്വവും ഗൗരവമായാണ് കാണുന്നത്.
കോഴിക്കോട് സൗത്തിന് പുറമെ പേരാമ്പ്രയിലും സ്ഥാനാർഥിയെച്ചൊല്ലി പ്രശ്നങ്ങൾ ഉണ്ടായിരുന്നു. ഈ മണ്ഡലത്തിലും സമാനമായ നടപടിയുണ്ടാകാൻ സാധ്യതയുണ്ട്. കഴിഞ്ഞ ദിവസം മലപ്പുറത്ത് ചേർന്ന ലീഗ് ഉന്നതാധികാര സമിതി ഇക്കാര്യങ്ങളിൽ തീരുമാനം എടുത്തിരുന്നു. പ്രവർത്തക സമിതി യോഗത്തിൽ ഇക്കാര്യത്തിൽ അന്തിമ തീരുമാനം ഉണ്ടാകും.
Also Read :
തെരഞ്ഞെടുപ്പിൽ തിരിച്ചടി നേരിട്ട മണ്ഡലങ്ങളിൽ കീഴ്ഘടകങ്ങൾ കാര്യക്ഷമമായി പ്രവർത്തിച്ചിട്ടില്ലെന്ന വിലയിരുത്തലിലാണ് നേതൃത്വം. തെരഞ്ഞെടുപ്പിലെ നടപടിയ്ക്ക് പിന്നാലെ വഖഫ് ബോർഡ് നിയമന വിവാദം, കെ- റെയിൽ സമരം തുടങ്ങിയ വിഷയങ്ങളും യോഗത്തിൽ ചർച്ചയാകും.
