കോഴിക്കോട് > സാമൂഹ്യ പ്രവർത്തക ബിന്ദു അമ്മിണിക്കുനേരെ വീണ്ടും ആക്രമണം. കോഴിക്കോട് ബീച്ചിൽവച്ച് മദ്യലഹരിയിൽ ഒരാൾ ക്രൂരമായി ആക്രമിക്കുകയായിരുന്നു. ബുധൻ വൈകിട്ടാണ് സംഭവം. സംഘപരിവാർ പ്രവർത്തകനാണ് ആക്രമിച്ചതെന്ന് ബിന്ദു അമ്മിണി പറഞ്ഞു. സംഭവത്തിൽ വെള്ളയിൽ പൊലീസ് കണ്ടാലറിയാവുന്ന ഒരാൾക്കെതിരെ കേസെടുത്തു. അടിപിടി, സ്ത്രീകളെ അപമാനിക്കൽ എന്നീ വകുപ്പുകൾ പ്രകാരമാണ് കേസെടുത്തത്. വാഹനം നിർത്തുന്നതുമായി ബന്ധപ്പെട്ട തർക്കം കൈയാങ്കളിയിൽ കലാശിക്കുകയായിരുന്നെന്ന് പൊലീസ് പറഞ്ഞു.
കേസുമായി ബന്ധപ്പെട്ട സത്യവാങ്മൂലത്തിൽഒപ്പിടാൻ വെള്ളിമാട്കുന്നിലെ ലോ കോളേജിൽനിന്ന് കൊണ്ടോട്ടി സ്വദേശികളായ സ്ത്രീകൾക്കൊപ്പം കാറിൽ ബീച്ചിന് സമീപമെത്തിയപ്പോഴാണ് സംഭവം. അഭിഭാഷകൻ സ്ഥലത്തില്ലാത്തതിനാൽചായ കുടിക്കാൻ പുറത്തിറങ്ങിയപ്പോഴാണ് കുറച്ചാളുകൾഇവരുടെ കാർതടഞ്ഞത്. കൂടുതൽപ്രശ്നങ്ങളുണ്ടാകരുതെന്ന് കരുതി കൂടെയുണ്ടായിരുന്ന സ്ത്രീകളെ ബിന്ദു അമ്മിണി പറഞ്ഞയച്ചു. പിന്നീടാണ് അക്രമികൾ ബിന്ദുവിനുനേരെ തിരിഞ്ഞത്. കഴുത്തിൽ പിടിച്ച് ഞെരിക്കുകയുംചെയ്തു. ഈ സംഭവങ്ങൾ സമീപത്തുള്ള ഒരാൾ മൊബൈലിൽ പകർത്തിയിരുന്നു. പിന്നീട് വെള്ളയിൽ പൊലീസിൽ പരാതി നൽകി.
