കണ്ണൂർ: കോൺഗ്രസിൻറേത്വീരസ്യം പറച്ചിലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. യുദ്ധം ചെയ്യാനുള്ള കെൽപ്പൊന്നും കേരളത്തിലെ കോൺഗ്രസിനില്ല. കോൺഗ്രസുകാർ മാത്രമാണ് സിൽവർലൈൻ പദ്ധതിയെ എതിർക്കുന്നത്.കേരളത്തിലെ ബഹുഭൂരിപക്ഷം ജനങ്ങളും പദ്ധതിക്കനുകൂലമാണെന്നും ഇത്തരത്തിൽ പദ്ധതിയെ എതിർക്കുന്ന കോൺഗ്രസുകാർ ഒറ്റപ്പെടുമെന്നും കോടിയേരി ബാലകൃഷ്ണൻ മാധ്യമങ്ങളോട് പറഞ്ഞു. ഒരു സർവേക്കല്ലെടുത്ത് മാറ്റിയത് കൊണ്ട് കെ-റെയിൽ പദ്ധതി ഇല്ലാതാകില്ലെന്നും അദ്ദേഹം കൂട്ടിച്ചേർത്തു.
കെ-റെയിൽ പദ്ധതിക്കെതിരായ സമരം ശക്തമാക്കുമെന്ന് കെ.പി.സി.സി അധ്യക്ഷൻ കെ. സുധാകരൻ ചൊവ്വാഴ്ച മാധ്യമങ്ങളോട് പറഞ്ഞിരുന്നു. ജനങ്ങളോട് ഒരു ബാധ്യതയുമില്ലാതെയാണ് മുഖ്യമന്ത്രി സിൽവർ ലൈൻ പദ്ധതിയുമായി മുന്നോട്ടുപോകുന്നതെന്നും പിണറായി വിജയൻ വാശി തുടർന്നാൽ യുദ്ധസമാനമായ സന്നാഹവുമായി പ്രതിപക്ഷം മുന്നോട്ട് പോകുമെന്നും കെ.സുധാകരൻ. കോടതി വിധി പോലും മാനിക്കാതെ സ്ഥാപിച്ച കെ-റെയിൽ കല്ലുകൾ പിഴുതെറിയുമെന്നും അദ്ദേഹം തിരുവനന്തപുരത്ത് നടത്തിയ വാർത്താസമ്മേളനത്തിൽ പറഞ്ഞു.
Content Highlights:congress is not in good shape for a war says kodiyeri on k sudhakarans comment
