കോഴിക്കോട്: മുഖ്യമന്ത്രി പ്രഖ്യാപിച്ച കെ.റെയിൽ പാക്കേജ് കോളനിക്കാരെ ഒഴിപ്പിക്കുന്ന തരത്തിലുള്ളതാണെന്ന് സമര സമിതി. നഷ്ടപരിഹാരമല്ല പ്രശ്നമെന്നും സമരവുമായി മുന്നോട്ട് പോവുക തന്നെ ചെയ്യുമെന്നും കെ.റെയിൽ സമരസമിതി ചെയർമാൻ ടി.ടി ഇസ്മയീൽ മാതൃഭൂമി ഡോട്കോമിനോട് പറഞ്ഞു.
പദ്ധതിയുമായി ബന്ധപ്പെട്ട് വമ്പൻ നഷ്ടപരിഹാര പ്രഖ്യാപനം സർക്കാർ നടത്തിയിട്ടുണ്ട്. ഇതിൽ ഞങ്ങളാരും തൃപ്തരല്ല. സമര സമിതി ആദ്യമേ ഉന്നയിക്കുന്ന കാര്യം പദ്ധതി ഉപേക്ഷിക്കുക എന്നതാണ്. ഈ ആവശ്യം നിറവേറ്റുന്നത് വരെ സമരവുമായി മുന്നോട്ട് പോവുമെന്നും ടി.ടി ഇസ്മീയിൽ പറഞ്ഞു.
പല പദ്ധതികൾക്കായും മുൻപ് പ്രഖ്യാപിച്ച പാക്കേജുകൾ ഇപ്പോൾ എവിടെയാണെന്ന് എല്ലാവർക്കും അറിയാം. ചെങ്ങറ, മൂലമ്പള്ളി പാക്കേജുകളെല്ലാം ഇന്നും പ്രഖ്യാപനത്തിൽ മാത്രമാണ്. കെ.റെയിലന്റെ പാരിസ്ഥിക, സമൂഹിക, സാമ്പത്തിക ആഘാതത്തെ പറ്റി ജനങ്ങൾ ഓരോ സെക്കൻഡിലും പഠിച്ചുകൊണ്ടിരിക്കുകയാണ്. നഷ്ടപരിഹാരം എന്ന ചർച്ചയിലേക്കേ ഞങ്ങൾ കടക്കുന്നില്ല. സർക്കാരിന് സമരത്തിന് മുന്നിൽ മുട്ടുമടക്കേണ്ടി വരുമെന്നും അദ്ദേഹം പറഞ്ഞു.
മൂന്നര കോടി ജനങ്ങളാണ് ഇതിന് ഇരയാകുന്നത്. കുടിയൊഴിഞ്ഞ് പോവുന്നവരേക്കാൾ കൂടുതൽ അനുഭവിക്കേണ്ടി വരിക ഇതിന് രണ്ട് ഭാഗത്തും ജീവിക്കുന്നവരാണ്. അവർ പുഴുക്കളെ പോലെ ജീവിക്കേണ്ടി വരും. കുടിയൊഴിപ്പിക്കപ്പെടുന്നവർ ഒരു പക്ഷെ ടാർപോളിൻ ഷീറ്റിന് കീഴിലോ മറ്റോ താമസിക്കുമായിരിക്കും. എന്നാൽ അതിനേക്കാൾ ഭീകരമായിരിക്കും അതിന് രണ്ട് ഭാഗങ്ങളിലും താമസിക്കുന്നവർ. ഇക്കാര്യങ്ങളിലെല്ലാം ജനങ്ങൾക്ക് നല്ല ബോധ്യമുണ്ടായിട്ടുണ്ട്. അതുകൊണ്ട് സമരം തുടരുക തന്നെ ചെയ്യും. മേധാപട്കർ അടക്കമുള്ളവർ വരും ദിവസങ്ങളിൽ സമരത്തിന് ഐക്യദാർഢ്യവുമായി എത്തും. സമരം ശക്തമാക്കുമെന്നും ടി.ടി ഇസ്മായിൽ പറഞ്ഞു.
