കണ്ണൂർ > കണ്ണൂർ തളിപ്പറമ്പ്‌ ദേശീയ പാതയിൽ പൊടിക്കുണ്ടിന് സമീപം ഓടിക്കൊണ്ടിരുന്ന ബസിന്‌ തീപിടിച്ചു. കോലത്തുവയൽ – കണ്ണൂർ – ജില്ലാആശുപത്രി റൂട്ടിലോടുന്ന മായ ബസാണ്‌ കത്തിയത്‌. രാവിലെ 9.45നാണ്‌ സംഭവം. ബസ്‌ പൂർണമായും കത്തി നശിച്ചു. ആളപായമില്ല.
ഗിയര്‍ ബോക്‌സിനടുത്തു നിന്ന് തീ പടര്‍ന്നതെന്നാണ് പ്രാഥമിക നിഗമനം. ബസിൽ നിന്ന് പുക ഉയരുന്നത് ശ്രദ്ധിൽപ്പെട്ടതിനെ തുടർന്ന് യാത്രക്കാർ മുഴുവൻ ബസിൽ നിന്ന് ഇറങ്ങിയതിനാൽ വൻ ദുരന്തം ഒഴിവായി. ഫയര്‍ഫോഴ്‌സും നാട്ടുകാരും ചേര്‍ന്ന് തീയണച്ചു. തീപിടുത്തത്തെ തുടർന്ന് ദേശീയ പാതയിൽ അൽപനേരം ഗതാഗത കുരുക്ക് അനുഭവപ്പെട്ടു.
