ക്രിയേറ്റീവ് ആയവർ അസന്മാർഗ രീതികൾ സ്വീകരിക്കാൻ മൂന്നു കാരണങ്ങളുണ്ടെന്നാണ് സോഷ്യൽ സൈക്കോളജിസ്റ്റായ മാർട്ടിൻ സ്‌റ്റോമിന്റെ നേതൃത്വത്തിൽ നടന്ന പഠനം പറയുന്നത്.
കാരണം-1
”ഭാവിയിൽ വിജയങ്ങൾ പ്രതീക്ഷിക്കുന്ന സർഗശേഷിയുള്ളവർക്ക് തങ്ങളുടെ അർഹതയെയും കഴിവിനെയും കുറിച്ച് ഉറച്ച ബോധ്യമുണ്ടാവും. അത്, ലക്ഷ്യങ്ങൾ നേടാൻ അതിരുകൾ ലംഘിക്കാൻ അവരെ പ്രേരിപ്പിക്കും.” തന്റെ ക്രിയേറ്റീവ് ഉൽപ്പന്നത്തിന്റെ വിജയം മുൻകൂട്ടി കാണുന്ന അവർ ലക്ഷ്യം നേടാൻ ഏതുമാർഗവും സ്വീകരിക്കുമത്രെ. അതായത്, ലക്ഷ്യം മാർഗത്തെ ന്യായീകരിക്കുമെന്നാണ് അവരുടെ വിശ്വാസം.
കാരണം-2
അസന്മാർഗപരമായ പ്രവൃത്തികൾക്ക് പലതരത്തിലുള്ള ന്യായങ്ങൾ കണ്ടെത്താൻ ക്രിയേറ്റീവ് ആയവർക്ക് കഴിയുമെന്നാണ് ഈ പഠനം പറയുന്നത്. അത്തരം ന്യായങ്ങൾ അവരെ കൂടുതൽ അസന്മാർഗപ്രവൃത്തികൾ ചെയ്യാനും പ്രേരിപ്പിക്കും. ഒരു വിഷയത്തിൽ ബഹുമുഖമായി ചിന്തിക്കാൻ ശേഷിയുള്ള ക്രിയേറ്റീവ് ആയവർക്ക് ന്യായങ്ങൾ കണ്ടെത്താനുള്ള ശേഷിയും കൂടുതലായിരിക്കും.
കാരണം-3
സമൂഹത്തിൽ നിലവിലുള്ള ചട്ടങ്ങൾ ലംഘിക്കാനും എതിരഭിപ്രായങ്ങൾ പ്രകടിപ്പിക്കാനും ക്രിയേറ്റീവ് ആയവർക്ക് ശേഷിയുണ്ട് എന്നതാണ് മൂന്നാം കാരണമെന്നാണ് പഠനം പറയുന്നത്.
ക്രിയേറ്റിവിറ്റിയും അസന്മാർഗപ്രവൃത്തികളും തമ്മിൽ വളരെ അടുത്ത ബന്ധമുണ്ടെന്നാണ് 36ൽ ഭൂരിപക്ഷം പഠനങ്ങളും ചൂണ്ടിക്കാട്ടുന്നതെന്ന് മാർട്ടിൻ സ്‌റ്റോം പറയുന്നു. പക്ഷെ, എന്താണ് ഈ ബന്ധത്തിന് കാരണമെന്ന് വിശദീകരിക്കാൻ പഠനങ്ങൾക്ക് കഴിഞ്ഞിരുന്നില്ല. ഓരോ പഠനത്തിലും സ്വീകരിച്ച രീതികളിലെ വ്യത്യാസമായിരുന്നു ഇതിന് കാരണം. അതിനാലാണ് 36 പഠനങ്ങൾ ഒരുമിച്ച് പരിശോധിക്കാൻ തീരുമാനിച്ചത്.
ലോകത്തിന്റെ വിവിധ ഭാഗങ്ങളിൽ നിന്നുള്ള ക്രിയേറ്റീവ് ആയ 6783 പേരാണ് 36 പഠനങ്ങളിൽ പങ്കെടുത്തിരുന്നത്. സിനിമ, നാടകം, സാഹിത്യം തുടങ്ങിയ മേഖലകളിലെ പ്രമുഖരാണ് ഈ പഠനങ്ങളിൽ പങ്കാളികളായത്. അവരുടെയെല്ലാം സാമൂഹിക സാഹചര്യങ്ങളും പ്രായവും പരിശോധിച്ചാണ് റിപ്പോർട്ട് തയ്യാറാക്കിയിട്ടുള്ളത്.
ക്രിയേറ്റിവ് ആയാൽ ലൈംഗികപങ്കാളികളുടെ എണ്ണം കൂടും
ക്രിയേറ്റിവിറ്റി കൂടുന്നത് ലൈംഗികപങ്കാളികളുടെ എണ്ണം കൂടാനുള്ള സാധ്യത വർധിപ്പിക്കുമെന്ന് 2005ൽ നടന്ന ഒരു പഠനത്തിൽ കണ്ടെത്തിയിരുന്നു. പ്രശസ്ത കവികളായ ബൈറൺ, ഡൈലൻ തോമസ് എന്നിവരുടെ ജീവിതം കൂടി പരിശോധിച്ചാണ് ഈ പഠനം നടന്നത്.
പ്രഫഷണൽ ആർടിസ്റ്റുകൾക്കും കവികൾക്കും സാധാരണക്കാരേക്കാൾ കൂടുതൽ ലൈംഗിക പങ്കാളികളുണ്ടാവുമെന്നാണ് ഈ പഠനം ചൂണ്ടിക്കാട്ടിയത്.
അമിതമായി ലൈംഗികപ്രവൃത്തികളിൽ ഏർപ്പെടുന്നവർക്കുണ്ടാവുന്ന സ്വഭാവസവിശേഷതകൾ ചില ആർട്ടിസ്റ്റുകൾക്കും കവികൾക്കുമുണ്ടെന്നും അന്ന് കണ്ടെത്തി. മാനവരാശിയുടെ അതിജീവനത്തിൽ ഇക്കൂട്ടർക്ക് വലിയ പങ്കുണ്ടെന്നും ഗവേഷകർ ചൂണ്ടിക്കാട്ടുന്നു.
”ക്രിയേറ്റീവ് ആയവർക്ക് സമൂഹത്തിൽ കൂടുതൽ ശ്രദ്ധ ലഭിക്കും. ഇത് ആകർഷകത്വവും സൃഷ്ടിക്കും. ജനങ്ങളുടെ ഹൃദയത്തിൽ സ്പർശിക്കുന്നവരാണ് അവർ. ലൈംഗികമായ അടുപ്പം രൂപപ്പെടാനും ഇത് കാരണമാവും. അവരിൽ നിന്ന് വിശ്വാസ്യതയും ആത്മാർത്ഥതയും ആരും പ്രതീക്ഷിക്കുന്നുമില്ല.” — പഠനത്തിന് നേതൃത്വം നൽകിയ ഡോ. ഡാനിയൽ നെറ്റിൽ സയൻസ് ഡെയ്‌ലിയോട് പറഞ്ഞു.
ആർട്ടിസ്റ്റുകൾക്കും കവികൾക്കും ഇത്തരം സ്വഭാവം വരുന്നതിന് പരിണാമപരമായ കാരണങ്ങളുണ്ടെന്നാണ് ഡോ. ഡാനിയൽ കരുതുന്നത്. ഇതിന് സ്‌കീസോഫ്രീനിയ എന്ന അവസ്ഥയുള്ളവരുമായി സാമ്യവുമുണ്ട്. ” ഇത്തരക്കാർ വിഷാദരോഗത്തിലും ആത്മഹത്യാ ചിന്തകളിലും വീഴാനുള്ള സാധ്യത വളരെ കൂടുതലാണ്. പങ്കാളിയെ ആകർഷിക്കലുമായും മനുഷ്യരുടെ ഭൂമിയിലെ അതിജീവനവുമായും ബന്ധമുള്ള പരിണാമപരമായ സ്വഭാവസവിശേഷതയാണ് ഇത്തരക്കാർ ഇന്നും സമൂഹത്തിലുണ്ടാവാൻ കാരണം.” — ഡോ. ഡാനിയേൽ കൂട്ടിച്ചേർത്തു.
****
Source: Psypost.org, ScienceDaily | Compiled by
Aneeb P.A
