അവിശ്വാസ പ്രമേയവുമായി ബന്ധപ്പെട്ട് പ്രശ്നങ്ങൾ നിലനിൽക്കുന്ന പശ്ചാത്തലത്തിൽ പോലീസിൻ്റെ സുരക്ഷയോടെയാണ് രാവിലെ 11 മണിയോടെ മൂന്നാർ പഞ്ചായത്ത് പ്രസിഡൻ്റ് തെരഞ്ഞെടുപ്പ് നടന്നത്. കോൺഗ്രസിൽ നിന്നും എൽഡിഎഫിലേക്ക് എത്തിയ പ്രവീണ രവികുമാറും യുഡിഎഫ് സ്ഥാനാർഥി ദീപയും തമ്മിലായിരുന്നു മത്സരം. ഭരണാധികാരി ഫറൂക്കിൻ്റെ നേതൃത്വത്തിലാണ് തെരഞ്ഞെടുപ്പ് നടന്നത്. ദീപയ്ക്ക് 9 വോട്ടുകളും പ്രവീണയ്ക്ക് 12 വോട്ടുകളും ലഭിച്ചു.
ജയം ഉറപ്പിച്ചതോടെ പ്രവീണ സത്യപ്രതിജ്ഞ ചെയ്ത് അധികാരമേറ്റു. സർക്കാരിൻ്റെ ലൈഫ് പദ്ധതി നടപ്പാക്കുമെന്ന് അവർ പറഞ്ഞു.
സംഘർഷസാധ്യത കണക്കിലെടുത്ത് പഞ്ചായത്ത് പരിസരത്ത് ശക്തമായ സുരക്ഷയാണ് പോലീസ് ഏർപ്പെടുത്തിയിരിക്കുന്നത്. കൂറുമാറിയ കോൺഗ്രസ് നേതാക്കൾക്കെതിരെ പ്രതിഷേധവുമായി കോൺഗ്രസ് അംഗങ്ങൾ രംഗത്തുവരുകയും മുദ്രാവാക്യങ്ങൾ മുഴക്കുകയും ചെയ്തു.
എല്‍ഡിഎഫ് പഞ്ചായത്തംഗങ്ങള്‍ അവിശ്വാസം കൊണ്ടുവരികയും രണ്ട് കോണ്‍ഗ്രസ് പഞ്ചായത്തംഗങ്ങള്‍ കൂറുമാറി എൽ ഡി എഫിനൊപ്പം നിൽക്കുകയും ചെയ്തതോടെയായിരുന്നു മൂന്നാര്‍ പഞ്ചായത്തില്‍ ഭരണമാറ്റമുണ്ടായത്. അവിശ്വാസ പ്രമേയദിവസം പ്രവർത്തകർ ചേരിതിരിഞ്ഞ് പ്രശ്നങ്ങൾ ഉണ്ടാക്കിയിരുന്നു. ഇതോടെയാണ് കനത്ത പോലീസ് കാവലിൽ പ്രസിഡൻ്റ് തെരഞ്ഞെടുപ്പ് നടന്നത്. 21 വാർഡുകളുള്ള മൂന്നാർ ഗ്രാമ പഞ്ചായത്തിൽ യുഡിഎഫിന് പതിനൊന്നും എൽഡിഎഫിന് പത്തും അഗങ്ങളാണുള്ളത്. യുഡിഎഫ് അംഗങ്ങളിൽ രണ്ട് പേർ കൂറിമാറി എൽഡിഎഫിനൊപ്പം നിന്നിരുന്നു.
