രാവിലെ ഏഴു മണിയോടെ കെപിസിസി വൈസ് പ്രസിഡൻ്റ് വി പി സജീന്ദ്രൻ പ്രതിപക്ഷ നേതാവ് വി ഡി സതീശൻ്റെ സാന്നിധ്യത്തിൽ ചിതാഭസ്മം കുടുംബാംഗങ്ങളിൽ നിന്ന് ഏറ്റുവാങ്ങുകയായിരുന്നു. തുടര്‍ന്ന് അലങ്കരിച്ച വാഹനത്തിൽ പ്രവര്‍ത്തകരുടെയും നേതാക്കളുടെയും അകമ്പടിയോടെയാണ് ഇടുക്കിയിലേയ്ക്ക് പോകുന്നത്. തന്‍റെ സംസ്കാരസമയത്ത് മതപരമായ പ്രാര്‍ഥനകള്‍ക്കു പകരം കേള്‍പ്പിക്കണമെന്ന് പി ടി തോമസ് ആവശ്യപ്പെട്ട ‘ചന്ദ്രകളഭം ചാര്‍ത്തി’യെന്ന ഗാനം സ്മൃതിയാത്രയിലും ഒപ്പമുണ്ട്.
Also Read:
തുറന്ന വാഹനത്തിൽ കൊണ്ടുപോകുന്ന ചിതാഭസ്മത്തിന് വിവിധ കേന്ദ്രങ്ങളിൽ പൊതുജനങ്ങൾക്ക് ആദരമര്‍പ്പിക്കാനും അവസരമുണ്ടാകും. എറണാകുളം ജില്ലയിൽ നിന്ന് ഇടുക്കി ജില്ലയിലേയ്ക്ക് കടക്കുന്ന നേരൃമംഗലത്ത് ഡിസിസി പ്രസിഡൻ്റ് സിപി മാത്യൂവിൻ്റെ നേതൃത്വത്തിൽ ചിതാഭസ്മം ഏറ്റവുവാങ്ങും. ഇരുമ്പുപാലം, അടിമാലി, കല്ലാര്‍കുട്ടി, പാറത്തോട്, മുരിക്കാശേരി വഴിയാണ് യാത്ര. വൈകിട്ട് നാലുമണിയോടെ ഉപ്പുതോട്ടിൽ എത്തിച്ചേരാൻ കഴിയുമെന്നാണ് കണക്കുകൂട്ടൽ.
ഉപ്പുതോട് കുരിശടിയിൽ വെച്ച് ചിതാഭസ്മം കുടുംബാംഗങ്ങള്‍ക്ക് കൈമാറും. ഉപ്പുതോട് സെൻ്റ് തോമസ് പള്ളി സെമിത്തേരിയിലാണ് പിടി തോമസിൻ്റെ അമ്മയെ സംസ്കരിച്ചിട്ടുള്ളത്. പള്ളിയോടു ചേര്‍ന്നു തയ്യാറാക്കിയ പന്തലിൽ പൊതുജനങ്ങള്‍ക്ക് ആദരം അര്‍പ്പിക്കാനുള്ള സൗകര്യമുണ്ടായിരിക്കും. തുടര്‍ന്ന് ബന്ധുക്കളുടെ നേതൃത്വത്തിലായിരിക്കും അമ്മയുടെ കല്ലറയിൽ ചിതാഭസ്മം അടക്കം ചെയ്യുക.
Also Read:
അതേസമയം, ചിതാഭസ്മം കല്ലറയിൽ നിക്ഷേപിക്കുന്ന ചടങ്ങുമായി ബന്ധപ്പെട്ട് ഇടുക്കി രൂപത പ്രത്യേകം നിര്‍ദേശങ്ങളും നല്‍കിയിട്ടുണ്ട്. ദേവാലയത്തിൻ്റെയും കല്ലറയുടെയും പരിപാവനത കാത്തുസൂക്ഷിക്കണമെന്നാണ് രൂപതയുടെ നിര്‍ദേശം. മതവികാരം വൃണപ്പെടുത്തുന്ന ഒന്നും ഉണ്ടാകാൻ പാടില്ല. പ്രാര്‍ഥനാപരായ നിശബ്ദത പുലര്‍ത്തണമെന്നും വികാരി ജനറാള്‍ നിര്‍ദേശിച്ചിട്ടുണ്ട്. ഇതുസംബന്ധിച്ച നിര്‍ദേശം പള്ളി വികാരിയ്ക്കും പാരിഷ് കൗൺസിലിനും കൈമാറിയതായും ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു.
