എൻഎസ്എസിനെ അവഗണിക്കുന്നവർ ചിലയിടങ്ങളിൽ നവോത്ഥാന നായകനായി മന്നത്ത് പത്മനാഭൻ്റെ ചിത്രം ഉയര്ത്തിക്കാട്ടിയിട്ടുണ്ട്. ഇത് ഇരട്ടത്താപ്പാണെന്ന് ജനം തിരിച്ചറിയും. എൻഎസ്എസ് എന്നത് മതേതര സംഘടനയാണ്. എല്ലാ സർക്കാരുകളുടെയും തെറ്റുകളെ എൻഎസ്എസ് വിമർശിക്കുകയും നല്ലതിനെ പ്രശംസിക്കുകയും ചെയ്തിട്ടുണ്ടുണ്ടെന്നും ജി സുകുമാരൻ നായർ വ്യക്തമാക്കി.
മന്നം ജയന്തിയിൽ സമ്പൂർണ അവധി നൽകണമെന്ന എൻഎസ്എസിൻ്റെ ആവശ്യം ന്യായമാണെന്ന് വി മുരളീധരൻ പറഞ്ഞു. ഹൈന്ദവ സമൂഹത്തിൻ്റെ പൊതു ആവശ്യമാണിത്. ഇക്കാര്യത്തിൽ മുഖ്യമന്ത്രിയുടെ ഭാഗത്ത് നിന്നുമുണ്ടാകുന്നത് നിഷേധാത്മക നിലപാടാണ്. തെരഞ്ഞെടുപ്പിൽ എൻഎസ്എസ് പക്ഷം പിടിക്കാത്തത് കൊണ്ടായിരിക്കും സർക്കാരിൻ്റെ നിഷേധാത്മക സമീപനം. ഇത് തിരുത്തണമെന്നും അദ്ദേഹം കൂട്ടിച്ചേർത്തു.
മന്നം ജയന്തി പൊതു അവധിയായി പ്രഖ്യാപിക്കണമെന്ന ആവശ്യം ദീർഘനാളായി എൻഎസ്എസ് ഉന്നയിക്കുന്നുണ്ട്. എന്നാൽ ഇക്കാര്യത്തിൽ കൃത്യമായ നടപടി സംസ്ഥാന സർക്കാരിൻ്റെ ഭാഗത്ത് നിന്നുമുണ്ടാകുന്നില്ല. കഴിഞ്ഞ യുഡിഎഫ് സർക്കാരിൻ്റെ കാലത്ത് മന്നം ജയന്തി പൊതു അവധിയായി പ്രഖ്യാപിച്ചിരുന്നു. എന്നാൽ, ബാങ്ക് ഉൾപ്പെടെയുള്ള സ്ഥാപനങ്ങൾക്ക് സമ്പൂർണ അവധി എന്നുള്ള കാര്യത്തിൽ ഇതുവരെ നടപടി ഉണ്ടായിട്ടില്ല. ഇക്കാര്യത്തിൽ സംസ്ഥാന സർക്കാരാണ് ശുപാർശ നൽകേണ്ടത്. 15 പൊതു അവധികളാണ് നിലവിലുള്ളത്. അതിൽ കൂടുതൽ അവധികൾ നൽകുന്നതിന് പരിമിതിയുണ്ടെന്നും പ്രത്യേക അനുമതി ആവശ്യമുണ്ടെന്നാണ് സർക്കാരിൻ്റെ നിലപാട്.
അതിനിടെ മന്നത്ത് പത്മനാഭൻ്റെ 45മത് ജന്മദിനാഘോഷം പെരുന്നയിൽ ആരംഭിച്ചു. പെരുന്നയിലെ മന്നം സമാധി മണ്ഡപത്തിൽ രാവിലെ 7.30 മുതൽ പുഷ്പാർച്ചന ആരംഭിച്ചു. എല്ലാ താലൂക്ക് യൂണിയനുകളും കരയോഗങ്ങളിലും ജയന്തി അനുസ്മരണ പരിപാടികൾ നടക്കും. കൊവിഡിൻ്റെ പശ്ചാത്തലത്തിൽ ജനുവരി ഒന്നും രണ്ടും തീയതികളിലായി നടക്കേണ്ട സമ്മേളനങ്ങളും ആഘോഷങ്ങളും ഒഴിവാക്കിയാണ് ഇത്തവണത്തെ മന്നം ജയന്തി.
