ആലപ്പുഴ > കായംകുളം എൻടിപിസിയിൽ പ്രവർത്തിക്കുന്ന കേന്ദ്രീയ വിദ്യാലയം നിലനിലനിർത്താൻ സംസ്ഥാന സർക്കാർ ഇടപെടൽ. സിവിൽ സെക്ടറിൽ വിദ്യാലയം ആരംഭിക്കുന്നതിന് മുഖ്യമന്ത്രിയുടേയും വിദ്യാഭ്യാസ മന്ത്രിയുടെയും തലത്തിൽ കേന്ദ്ര സർക്കാരിന് കത്ത് നൽകാൻ തീരുമാനിച്ചു. വിദ്യാഭ്യാസമന്ത്രി വി ശിവൻകുട്ടിയുടെ അധ്യക്ഷതയിൽ എ എം ആരിഫ് എംപി, രമേശ് ചെന്നിത്തല എംഎൽഎ എന്നിവരുടെ സാന്നിധ്യത്തിൽ കേന്ദ്രീയ വിദ്യാലയ സംഗതൻ അധികൃതർ, എൻടിപിസി അധികൃതർ, സ്കൂൾ പ്രിൻസിപ്പൽ, പിടിഎ ഭാരവാഹികൾ, മറ്റ് ഉദ്യോഗസ്ഥർ എന്നിവരുടെ യോഗത്തിൽ ആണ് തീരുമാനം.
സംസ്ഥാന സർക്കാർ എൻടിപിസിക്ക് വർഷം തോറും 100 കോടി രൂപ നൽകി വരുന്ന സാഹചര്യത്തിൽ അതിൽ നിന്ന് വിദ്യാലയ നടത്തിപ്പിന് ആവശ്യമായ വിഹിതം ലഭ്യമാക്കുന്നതിന് വൈദ്യതിമന്ത്രിയുമായി വിദ്യാഭ്യാസമന്ത്രി, എംപി, എംഎൽഎ എന്നിവർ ചർച്ച നടത്താനും തീരുമാനമായി. പകരം സംവിധാനം ഉണ്ടാകുന്നതുവരെ നിലവിലെ സ്ഥിതി തുടരണമെന്ന് എൻടിപിസി അധികൃതരോട് അഭ്യർത്ഥിക്കും. യോഗത്തിന്റെ പൊതുവികാരം കേന്ദ്രീയ വിദ്യാലയ സംഗതൻ കമീഷണറെ അറിയിക്കാൻ ഡെപ്യൂട്ടി കമീഷണറെയും എൻടിപിസി ഉന്നത അധികാരികളെയും ചുമതലപ്പെടുത്തി.
രണ്ട് പതിറ്റാണ്ടിലേറെയായി കായകുളം ചേപ്പാട് പ്രവർത്തിച്ചു കൊണ്ടിരിക്കുന്ന കായംകുളം കെവിഎൻറ്റിപിസിയിൽ 750- ലധികം വിദ്യാർഥികൾ പഠിക്കുന്നുണ്ട്. സ്കൂളിനുള്ള സാമ്പത്തിക സഹായവും സ്പോൺസർഷിപ്പും എൻടിപിസി 2022 മാർച്ചിൽ അവസാനിപ്പിക്കുന്ന പശ്ചാത്തലത്തിൽ ആണ് സംസ്ഥാന സർക്കാരിന്റെ ഇടപെടൽ.
