കഴിഞ്ഞ ദിവസങ്ങളിലായിട്ടാണ് മൂന്ന് പേരെ കസ്റ്റഡിയിലെടുത്തത്. ഒരാളെ ബെംഗളൂരുവിൽ വെച്ചാണ് കസ്റ്റഡിയിലെടുത്തത്. കൃത്യത്തിൽ പങ്കെടുത്ത അനൂപ്, അഷ്റഫ് എന്നിവരുടെ അറസ്റ്റ് ഇന്ന് രേഖപ്പെടുത്തിയേക്കും. ഉന്നത പോലീസ് ഉദ്യോഗസ്ഥരുടെ സാന്നിധ്യത്തിൽ കസ്റ്റഡിയിലുള്ളവരെ ചോദ്യം ചെയ്യുകയാണ്. കസ്റ്റഡിയിലുള്ള രണ്ട് പേർ ആലപ്പുഴ സ്വദേശികളാണ്.
12 പേരാണ് കൊലപാതകത്തിൽ നേരിട്ട് പങ്കെടുത്തതെന്നാണ് പോലീസ് നിഗമനം. പിടിയിലായവരിൽ നിന്നും ലഭിക്കുന്ന വിവരങ്ങൾ വഴി മറ്റുള്ള പ്രതികളിലേക്ക് എത്താനാകുമെന്ന പ്രതീക്ഷയിലാണ് അന്വേഷണ സംഘം. രഞ്ജിത് വധത്തിൽ നേരിട്ട് പങ്കെടുത്ത ആരുടെയും അറസ്റ്റ് രേഖപ്പെടുത്തിയിട്ടില്ല. തെളിവ് നശിപ്പിക്കൽ, പ്രതികളെ സഹായിക്കുക എന്നീ കുറ്റങ്ങളാണ് അറസ്റ്റിലായ അഞ്ച് എസ്ഡിപിഐ പ്രവർത്തകരിലും ചുമത്തിയിരിക്കുന്നത്.
ബിജെപി നേതാവും ഒബിസി മോർച്ച സംസ്ഥാന സെക്രട്ടറിയുമായ രഞ്ജിത് ശ്രീനിവാസിൻ്റെ കൊലപാതകത്തിലെ എല്ലാ പ്രതികളെയും തിരിച്ചറിഞ്ഞതായി എഡിജിപി വിജയ് സാഖറെ കഴിഞ്ഞ ദിവസം വ്യക്തമാക്കിയിരുന്നു. അതേസമയം എസ്ഡിപി ഐ നേതാവ് ഷാൻ വധക്കേസിൽ മുഖ്യ പ്രതികളടക്കമുള്ളവർ പിടിയിലായി. ഗൂഢാലോചനയിൽ പങ്കാളികളായവരിൽ ചിലർ മാത്രമാണ് ഇനി അറസ്റ്റിലാകാനുള്ളത്.
എസ്ഡിപിഐ സംസ്ഥാന സെക്രട്ടറിയുടെ കൊലയ്ക്ക് പിന്നാലെയാണ് ഒബിസി മോര്‍ച്ച സംസ്ഥാന സെക്രട്ടറി രഞ്ജിത് ശ്രീനിവാസൻ കൊല്ലപ്പെട്ടത്. ആലപ്പുഴ വെള്ളക്കിണറിലെ വീട്ടിൽ വെച്ചാണ് കൊലപാതകം. പുലർച്ചെ പ്രഭാത സവാരിക്ക് തയ്യാറെടുക്കുന്നതിനിടെ അക്രമി സംഘം വീട്ടിൽ കയറി രഞ്ജിത്തിനെ ആക്രമിക്കുകയായിരുന്നു. ആലപ്പുഴ നിയോജകമണ്ഡലത്തിലേക്ക് മത്സരിച്ച നേതാവാണ് കൊല്ലപ്പെട്ട രഞ്ജിത് ശ്രീനിവാസന്‍.
