കോട്ടയം> രാജ്യത്ത് കൈസ്തവര്ക്കു നേരെയുള്ള അതിക്രമങ്ങള് സമീപ നാളുകളില് കൂടിവരുന്നതായി സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണന്. സിപിഐ എം നിര്മിച്ച വീടുകളുടെ താക്കോല് കൈമാറി സംസാരിക്കുകയായിരുന്നു അദ്ദേഹം. ബിജെപി സര്ക്കാര് അധികാരത്തില് വന്നതു മുതല് പശുവിന്റെ പേരിലും മറ്റും മുസ്ലീം സമൂഹമാണ് വ്യാപകമായി ആക്രമിക്കപ്പെട്ടതെങ്കില് സമീപ നാളുകളില് അത് ക്രൈസ്തവരിലേക്കും വ്യാപിച്ചു.
രാജ്യത്ത് ക്രിസ്മസ് കരോളുകള് വ്യാപകമായി ആക്രമിക്കപ്പെട്ടു. ഹരിയാനയിലെ അംബാലയില് പട്ടാളക്കാരുടെ കന്റോണ്മെന്റ് മേഖലയില് പള്ളി ആക്രമിച്ച് ക്രിസ്തുദേവന്റെ രൂപം നശിപ്പിച്ചതായാണ് മാധ്യമ വാര്ത്തകള്. പട്ടാളം ഉള്ളയിടത്ത് ഇതെങ്ങനെ നടന്നു. ബ്രിട്ടീഷ് ഭരണകാലത്തുള്ള പള്ളിയാണിത്.
ആസാമിലും വ്യാപക അതിക്രമങ്ങള് നടന്നു. ബംഗളൂരുവില് ക്രൈസ്തവ ദേവാലയങ്ങള് പോലും പ്രവര്ത്തിപ്പിക്കാന് അനുവദിക്കുന്നില്ല.ഇതൊന്നും കേരളത്തില് നടക്കാത്തത് ഇവിടെ കോണ്ഗ്രസ് ഉള്ളതുകൊണ്ടല്ല, കമ്യൂണിസ്റ്റുകാരുള്ളതുകൊണ്ടാണ്. എല്ഡിഎഫ് ഭരണത്തില് അത് നടക്കില്ല. മതനിരപേക്ഷതയ്ക്ക് മോദി ഭരണം വെല്ലുവിളി ഉയര്ത്തുന്നു. ഈ കോര്പറേറ്റ് വര്ഗീയ ഭരണം ഇല്ലാതാക്കാനുള്ള നടപടികള് വരുന്ന പാര്ടി കോണ്ഗ്രസ് ചര്ച്ച ചെയ്യുമെന്നും അദ്ദേഹം പറഞ്ഞു.
